पश्चिमाञ्‍चल ट्यांकर व्यवसायीले पेट्रोलियम पदार्थको ढुवानी नरोक्ने

बुटवल- पश्चिमाञ्‍चल टैङ्कर व्यवसायी संघले पेट्रोलियम पदार्थको ढुवानी नरोक्ने भएको छ। काठमाडौंसहित देशभर पेट्रोलियम पदार्थको कमिशन नपाएको भन्दै ढुवानी रोक्ने बताए पनि लुम्बिनीमा क्षेत्रको ट्यांकर व्यवसायीले भने ढुवानी नरोक्ने भएका हुन्। 

सामाजिक उत्तरदायित्वमा समेत हामी व्यवसायीहरू जिम्मेवार हुने र समाजमा नकरात्मक सन्देश जाने भएकाले निगमको अनुरोधलाई स्विकार गरि ढुवानी नरोक्ने निर्णय गरिएको संघका महासचिव भुपराज अर्यालले जानकारी दिए। 

पश्चिमाञ्चल ट्यांकर व्यवसायी संघले शुक्रबार बुटवलमा पत्रकार सम्मेलन गरि आफूहरुको माग यथावत रहेपनि ढुवानी नरोक्ने स्पष्ट पारेको हो। नेपाल आयल निगम समक्ष ६ बुँदे माग वार्ताद्धारा समाधान गर्ने भन्दै पश्चिमाञ्चल टै्ंकर व्यवसायीले आन्दोलन नगर्ने जनाएको छ।  

६ बुँदे यथार्थ मागहरु यथावतै रहेको तर आन्दोलनको कार्यक्रम स्थगित गरीएको संघका प्रमुख सल्लाहकार चोपनारायण श्रेष्ठले बताए।

संघको यही  चैत १६ गते बसेको बैठकबाट नेपाल आयल निगम, नेपाल सरकार र व्यबसायी बीच वार्ता बसी समस्या समाधान गर्न अनुरोध गर्ने निर्णय गरेको थियो।