निर्मलाको शव अस्पतालमै, सिआईबीको टोली कञ्चनपुर पुग्यो

धनगढी- बलात्कार पछि हत्या गरिएकी कञ्चनपुरको भीमदत्त नगरपालिका वडा नम्बर २ की १३ वर्षीया निर्मला पन्तको शव अस्पतालबाट अझैँ उठ्न सकेको छैन । 

मृतकका परिवार शव बुझेर दाहासस्कार गर्ने तयारीमा जुटे पनि आन्दोलनरत पक्षको अवरोधका कारण आइतबार पनि दाहासस्कार हुन सकेन । दाहासस्कारका लागि परिवार अञ्चल अस्पताल पुगे पनि आन्दोलनकर्मीको अवरोधले खाली फर्किएका हुन् । 

आन्दोलनकर्मीले घट्नास्थल टोलमा प्रहरी बिट स्थापना नगर्दा सम्म र दोषि पत्ता नलगाउदा सम्म अस्पतालबाट शव उठाउन नदिने अडान राखे पछि शव उठ्न नसकेको हो । 

कञ्चनपुर कांग्रेस, नेकपा र राजपा तीन दलले अपिलसहितको संयुक्त विज्ञप्ति प्रकाशित गर्दै बालिकाको दाहासस्कारमा सहयोग गर्ने, दोषिको खोजी तथा कारवाहि र राहत तथा क्षतिपुर्तिका लागि सम्बन्धित निकायमा पहल गर्ने जनाए ।

 तर तीन दलको उक्त अपिलको आन्दोलनरत पक्षले वास्ता गरेन । बालिकाको शव भेलिएलगत्तै आन्दोलनमा उत्रेका स्थानीयले प्रहरीले घट्नाबारे खासै चाँसो नदेखाएको आरोप लगाएका छन् । 

बालिकाको हत्यामा संलग्नको पत्तालगाउन माग गर्दै थालिएको आन्दोलनमा प्रहरीको हस्तक्षप भएपछि आन्दोलन झन चर्किएको हो । बालिका हराएलगत्तै प्रहरीलाई खबर गरे पनि भोली खोजौला भन्ने जवाफ आएको भनेपछि आफन्त प्रहरीप्रति बढि आर्कोषित बनेका हुन् ।

सिआईवीको टोलीले अनुसन्धान थाल्यो

निर्मला हत्याको घट्ना बारे अनुसन्धान गर्न प्रहरी प्रधान कार्यलयबाट सिआईवीको टोली आइतबार कञ्चनपुर पुगेको छ । टोलीले आइतबार बेलुकीबाट नै घट्नाको अनुसन्धान थालेको प्रहरी नायव उपरीक्षक ज्ञानबहादुर सेठीले जानकारी दिए । कञ्चनपुर प्रहरी भने तीन दिनदेखि आन्दोलनको पछि छ । 

गम्भिर भएर छानविन गर्न प्रदेश सांसदको माग

आइतबार बसेको प्रदेश ७ को प्रदेश सभा बैठकमा सांसदहरुले निर्मलाको घट्नामा गम्भिर भएर छानविन गर्न सरकारको ध्यानाकर्षण गराएका छन् ।  बैठकको सुरुमै विशेष समय लिएर बोल्दै संसादहरु डाक्टर रणबहादुर रावल, देवकी मल्ल, प्रकाश रावल र तारा लामा तामाङले निर्मलाको घट्ना प्रदेशकै शान्ति सुरक्षामा चुनौती थपेको बताए । 

डाक्टर रावलले दिनहुँजसो हत्या बलात्कारका घट्ना बढ्नुले प्रदेश सरकारको सुरक्षाको अवस्था शुन्य जस्तै देखिएको बताए । सांसदहरुले उठाएका बिषय माथि प्रकाश पार्दै आन्तरिक मामिला तथा कानूनमन्त्री प्रकाशबहादुर शाहले निर्मला पन्तको घटनाबारे गम्भिर छानविन भइरहेको बताए । 

मन्त्री शाहले प्रहरीले अनुसन्धान तिब्र पारेको र दोषिलाई कानूनी दायरामा ल्याएरै छोड्ने प्रतिबद्धता जनाए ।

कैलालीमा पनि आन्दोलन

कञ्चनपुरमा भएको बलात्कार पछि हत्याको बिरोधमा कैलालीमा पनि आन्दोलन सुरु भएको छ । निर्मला हत्या काण्डका अपराधीलाई कारवाहिको माग गर्दै विद्यार्थी र स्वयम्सेवक युवा समुह धनगढीले आइतबार धनगढीमा दबाबमुलक र्‍याली निकालेका छन् ।
 
कैलाली बहुमुखी क्याम्पस स्वतन्त्र विद्यार्थी युनियन र सामाजिक कार्य विद्यार्थी समुहले संयुक्त रुपमा बिहान दबाबमुलक र्‍याली निकाले । र्‍यालिमा बहुमुखी क्याम्पसका सम्पुर्ण विद्यार्थीले दोषिलाई कारवाहि गर, पीडितलाई न्याय देउ, बालिका हत्यार लाई फाँसी देउ जस्ता नारा लगाए ।