नागरिकता बनाउन किर्ते सिफारिस गर्ने वडाध्यक्ष पक्राउ

स्याङ्जा- नागरिकता बनाउन किर्ते सिफारिस गरेको आरोपमा प्रहरीले आँधीखोला गाउँपालिका-३ का वडाध्यक्षलाई पक्राउ गरेको छ।

नेपाली नागरिकताका लागि झुटा विवरण सिफारिस गरेको भन्दै स्थानीयले कारबाहीको माग गरेपछि वडाध्यक्ष विष्णुबहादुर खत्री पक्राउ परेका छन्। उनीसँगै अन्य चार जनालई पनि पक्राउ गरिएको छ।

पक्राउ पर्नेमा सचिव बालकृष्ण शर्मा, सोही वडाका नवराज पौडेल, सीता पौडेल र कुश्माका सोनु पौडेल भन्ने सोनु अधिकारी रहेका छन्।

झुटो काममा संलग्न भएको भन्दै कारबाहीको माग गरी जिल्ला प्रशासन कार्यालय स्याङ्जामा स्थानीयले उजुरी दिएका थिए। पर्वतको कुश्मा नगरपालिका-२ बस्ने कृष्ण अधिकारी र डोम अधिकारीका छोरी सोनु अधिकारीले स्याङ्जाको आँधिखोला गाउँपालिका-३ बस्ने कृष्णप्रसाद पौडेल र सीता पौडेलको छोरी बनेर वंशजको आधारमा नागरिकता लिएको नायब उपरीक्षक राजेन्द्रप्रसाद अधिकारीले जानकारी दिए। 

२० वर्षीया सोनुले यही चैत १ गते जिल्ला प्रशासन कार्यालय स्याङ्जाबाट नेपाली नागरिकताको प्रमाणपत्र लिएकी छन्।