सत्तापक्षकै सांसदले गरे मुख्यमन्त्रीको आलोचना

जनकपुरधाम– राजधानी जनकपुरसहित प्रदेश २ मा आपराधिक घटना निरन्तर बढेर गएको छ । प्रहरीकै तथ्यांक हेर्दापनि राजधानी जनकपुर रहेको धनुषा जिल्लामा पछिल्लो वर्षको तुलनामा १३ प्रतिशतले आपराधिक घटना बढेको छ भने १९ जनाको हत्या भएको छ । शान्ति सुरक्षा तथा सुशासन  कायमगर्न असफल भएको भन्दै प्रदेशसभामा सत्ताररुढ तथा विपक्षी दलका सांसदहरुले सरकारको आलोचना गरेका छन् । 

सुशासन र शान्ति व्यवस्था सम्बन्धी प्रदेश सरकारको अभिव्यक्ति भाषण र नारामा मात्रै सिमित भएको भन्दै आइतबार बसेको प्रदेशसभा बैठकमा बाल्दै सांसदहरुले सरकारको आलोचना गरेका छन् ।

नेपाली कांग्रेसका प्रदेशसभा सदस्य राजेश्वरप्रसाद साहले मुख्यमन्त्री लालबाबु राउतले आफ्नै गृहजिल्ला पर्सामा समेत आपराधिक घटना नियन्त्रण गर्न नसकेको भन्दै सरकारको आलोचना गरे । 

पर्साको बहुदरमाई नगरपालिका–२ का संजयकुमार साहका १३ वर्षीय छोरा सुजित साह र त्यही परिवारका शिवजी साहको ६ वर्षीय छोरा आयोग साहको अपहरण पश्चात हत्या गरिएको प्रसंग कोट्याउँदै सांसद साहले प्रदेश सरकार शान्ति व्यवस्था कायमगर्न असफल भएको बताए । सुजितको १३ मंसिर २०७४ र आयोगको ३१ असारमा शव बरामद भएको थियो ।

पहिलो घटनाको हत्यारालाई कारबाही भएको अवस्थामा साह परिवारले अर्को सन्तान गुमाउने अवस्था आउँदैन थियो होला उनको भनाइ थियो । सांसद साहले एकैदिन तीनजना बालिका बलात्कृत हुनु सरकारको सुशानको नारामाथि प्रश्न चिन्ह खडा गरेको बताए । ४ साउनमा पर्साको सुगौली गाउँपालिका, सखुवा पर्सौनी गाउँपालिका र गढी नगरपालिकामा एकैदिन तीनजना बालिका बलात्कृत भएकी थिइन् ।

सरकारको कामकारबाहीविरुद्ध प्रतिपक्ष मात्र नभएर सत्तापक्षका सांसद पनि असन्तुष्ट देखिएका छन् । सरकारको कामकारबाहीको विरोध गर्दै गठबन्धन दल राजपाका सांसद मनिष सुमनले कडा आलोचना गरे ।

प्रदेशसभा बैठकमा बोल्दै सांसद सुमनले प्रदेश र संघीय सरकारको कामकारबाहीबाट भ्रष्टाचारतर्फ उद्त रहेको आरोप लगाए । भ्रष्टाचार गर्न मधेशी जनताले संघर्ष नगरेको स्मरण गराउँदै सांसद सुमनले भ्रष्टाचारलाई उन्मुक्ति गराउन माग गरे ।

भारतीय प्रधानमन्त्री नरेन्द्र मोदीको जनकपुर भ्रमणको क्रममा भएको खर्च प्रदेश सरकारले हालसम्म सार्वजनिक गर्न नसकेको भन्दै उनले संसदीय समिति बनाई छानबिन गर्न माग गरेका छन् । यसविषयमा प्रदेशको विपक्षी दलहरु पनि चुप लागेर बस्नु आश्चर्यजनक रहेको उनले बताए ।

नेकपका सांसद सुन्दरबहादुर विश्वकर्माले बितेको आर्थिक वर्षमा कुन योजनामा कति खर्च भयो भन्दै संसदलाई जानकारी गराउन सरकारसँग माग गरे ।
यसैबीच विपद व्यवस्थापन र आक्समिक कोष सञ्चालन सम्बन्धी विधेयक छलफलको लागि प्रदेशसभामा टेबल भएको छ ।