पन्त, सिंह र धानुक एआईजीमा बढुवा

काठमाडौं– सरकारले नेपाल प्रहरीका तीन जना प्रहरी नायब महानिरीक्षक (डीआईजी) लाई अतिरिक्त महानिरीक्षक (एआईजी)मा बढुवा गरेको छ। मन्त्रिपरिषद्को बिहीबार बिहान बसेको बैठकले वसन्तकुमार पन्त, धीरजप्रताप सिंह र रवीन्द्रबहादुर धानुकलाई एआईजीमा बढुवा गरेको हो।

गृह मन्त्रालयका सचिव अध्यक्ष, प्रधानमन्त्री कार्यालयका सचिव सदस्य र प्रहरी महानिरीक्षक सदस्यसचिव रहेको बढुवा समितिले चैत १ गते डीआईजीहरू पन्त, सिंह र धानुकलाई एआईजीमा बढुवा गर्न सिफारिस गरेको थियो।

उनीहरुको बढुवाका लागि भएको सिफारिसविरुद्ध लोकसेवा आयोगमा उजुरी परेको थियो। वरिष्ठता र कार्यसम्पादन मूल्यांकनमा कनिष्ठ रहेका डीआईजीलाई एआईजीमा बढुवा गर्न सिफारिस गरिएको भन्दै चैत १३ गते तीन डीआईजी घनश्याम अर्याल, ईश्वरबाबु कार्की र प्रकाशजंग कार्कीले लोकसेवा आयोगको ‘उजुरी सुन्ने’ समितिमा निवेदन दिएका थिए। समितिले सिफारिसमा कुनै त्रुटि नदेखिएको निष्कर्ष निकालेपछि उनीहरुको बढुवा भएको हो।