पलाउ र दक्षिण सुडानसँग नेपालको कूटनीतिक सम्बन्ध कायम

काठमाडौं- नेपालले थप दुई देशसँग कूटनीतिक सम्बन्ध कायम गरेको छ। सोमबार नेपालको परराष्ट्र मन्त्रालयले आयोजना गरेको पत्रकार सम्मेलनमा प्रवक्ता सेवा लम्सालले गणतन्त्र पलाउ र दक्षिण सुडान कूटनीतिक सम्बन्ध कायम गरिएको जानकारी दिएकी हुन्। 

'नेपालले गणतन्त्र पलाउ र दक्षिण सुडान कूटनीतिक सम्बन्ध कायम गरेको छ,' उनले भनिन्। यससँगै नेपालको १७५ देशसँग कूटनीतिक सम्बन्ध स्थापना भएको छ। 

नेपालबाट बाहिर पुगेका पुरातात्त्विक महत्वका ७९ वटा सम्पदा स्वदेश फर्काइएको पनि उनले जानकारी दिइन्। तिब्बतबाट २८, कलकत्ताबाट १३, बेलायतबाट १९, अमेरिकाबाट १७, अष्ट्रियाबाट १ र जर्मनीबाट १ थान सम्पदा नेपाल फिर्ता ल्याइएको हो। 

यसका साथै नेपालको परराष्ट्र मन्त्रालय र दक्षिण अफ्रिकाको परराष्ट्र मन्त्रालयबीच द्विपक्षीय परामर्श संयन्त्रको स्थापना गर्ने सम्झौतामा दुई देशका परराष्ट्र सचिवको स्तरमा हस्ताक्षर भएको पनि उनले उल्लेख गरिन्। नेपाल र बंगलादेशका परराष्ट्र सचिव स्तरीय तेस्रो बैठक आगामी अप्रिल ११ देखि १३ सम्म पोखरामा हुने पनि उनले जानकारी दिइन्।