इटहरीमा बम विस्फोट हुँदा दुई जना घाइते

काठमाडौं- सुनसरीको इटहरीमा गएराति राती बम विष्फोट हुँदा दुई जना घाइते भएका छन्। प्रहरीका अनुसार विस्फोटमा परी इटहरी २ हलगडाको नवजागृति टोलमा डेरा गरी बस्ने २२ वर्षीय रबिन थापा र लमजुङ ५ ढोडेनीका २३ वर्षीय शेरजंग गुरुङ घाइते भएका हुन्। थापाको डेरा भित्रै गएराती  बम बिस्फोट भएको प्रहरीले जनाएको छ। 

घाइते मध्ये थापाको आँखामा चोट लागेको छ भने गुरुङको शरिरका विभिन्न अंगहरूमा चोट लागेको छ। थापाको विराटनगरको आँखा अस्पतालमा उपचार भइरहेको छ भने गुरुङको धरानस्थित विपी कोइराला स्वास्थ्य विज्ञान प्रतिष्ठानमा उपचार भइरहेको इलाका प्रहरी कार्यालय जानाएको छ। 

विस्फोट भएको बम सुतली बम भएको प्रहरीले जनाएको छ। घटनास्थलबाट प्रहरीले हिमाल सुरक्षा परिषद नेपालको पर्चा बरामद गरेको छ। हिमाल सुरक्षा परिषदको पर्चा सशस्त्र युद्धको घोषणा गरेको संगठन भएको प्रहरीले जनाएको छ।