टेप्पुमा सवार दुई जना लागूऔषधसहित प्रहरी नियन्त्रणमा

धनुषा- महोत्तरीबाट प्रहरीले लागूऔषधसहित दुईजनालाई पक्राउ गरेको छ। पक्राउ पर्नेमा सिन्धुलीको कमलामाई नगरपालिका-४ धुराबजार बस्ने १९ वर्षीय रवि विक र कमलामाई नगरपालिका-५ बस्ने २१ वर्षीय सुमन कुमार श्रेष्ठ रहेका छन्।

गौशालाबाट बर्दिबासतर्फ आउँदै गरेको अटो टेम्पोमा सवार केही व्यक्तिले लागूऔषध बोकी ओसारपोसार गरिरहेको भन्ने  सूचनाको आधारमा प्रहरीले उनीहरूलाई पक्राउ गरेको जनाएको छ।

पूर्वपश्चिम राजमार्गअन्तर्गत महोत्तरीको बर्दिबास नगरपालिका-५ माईस्थानस्थित चेकप्वाइन्टमा ज१ह १९३९ नम्बरको अटो टेम्पोलाई रोकेर खानतलासी गर्दा टेम्पुको पछाडि पट्टीको डिक्कीमा लुकाई छिपाई बोकी ल्याएको लागूऔषध बरामद भएको इलाका प्रहरी कार्यालय बर्दिबासले  जनाएको छ।

उनका अनुसार क्लोरोफेनारामाइन मेलेट सिरप एक्सीप्लोन १०० एमएलको ५ बोत्तल, नाइट्राभेट–१० लेखिएको १९ चक्की र ट्रमाडोल क्याप्सुल ८ चक्की बरामद गरिएको छ।

लागूऔषधसहित पक्राउ परेका विक र श्रेष्ठलाई  महोत्तरी जिल्ला अदालतबाट पाँच दिनको म्याद थप गरेर अनुसन्धान गरिरहेको इलाका प्रहरी कार्यालय बर्दिबासले जनाएको छ।