प्रधानन्यायाधीशमा जोशीको नाम आजै अनुमोदन होला ? 

काठमाडौँ- प्रधानन्यायाधीशमा सिफारिस भएका दीपकराज जोशीको नाम अनुमोदन गर्ने वा थप अनुसन्धान गर्ने भन्ने विषयमा निर्णय गर्न संसदीय सुनवाई विशेष समितिको बैठक बस्दै छ ।

बिहान करिब ८ बजे बस्ने सिंहदरवारमा बस्ने बैठकमा जोशीको अनुमोदन गर्ने वा नगर्ने भन्ने विषयमा छलफल हुने एक सदस्यले जानकारी दिए । उनका अनुसार आजै अनुमोदन गर्ने की थप अनुसन्धान गरेर अनुमोदन गर्ने भन्ने विषयमा बैठकमा सदस्यहरुले धारणा राख्ने छन् । 

गत बिहीबार सुनुवाइ सकिए पनि जोशीको अनुमोदनबारे निर्णय भएको छैन । सुनुवाइमा सांसदहरूले सोधेका प्रश्नहरूको विश्वस्त जवाफ नदिएको र शैक्षिक प्रमाणपत्र विवाद बाहिर आएकाले अब के गर्ने भन्ने निर्णय लिइने समितिका एक सदस्यले जानकारी दिए।

सुनुवाइकै क्रममा उनको शैक्षिक योग्यताको प्रमाणपत्र विवादमा आएपछि सुनुवाइ समितिले थप अध्ययन गर्नुपर्ने भन्दै निर्णय गरेको छैन । स्रोतका अनुसार आजको बैठकले उनका विषय उठेका आशंका बारे छानविन गर्न उपसमिति बनाउने छ । 

१५ सदस्यीय समितिमा दुई तिहाइ पुर्‍याउन १० जना सदस्यको सहमति आवश्यक पर्छ । संवैधानिक व्यवस्थाअनुसार समितिको दुई तिहाइ मतले सिफारिस अस्वीकृत गर्न सक्छ ।