प्रदेश १ को संसद् बैठक आज बस्दै

काठमाडौं- प्रदेश १ संसद्को बैठक आज बस्ने भएको छ। संसद् भवन विराटनगरमा दिउँसो १ बजे बैठक बस्ने भएको हो।

बैठकमा ‘प्रदेश सञ्चार माध्यम व्यवस्थापन गर्न बनेको विद्येयक’ माथि सैद्धान्तिक छलफल हुने भएको छ। विद्येयकमाथि बिहीबारदेखि छलफल भइरहेको प्रदेश सभा सचिव गोपाल प्रसाद पराजुलीले जानकारी दिए। 

बैठकमा सांसदहरूले प्रदेशको नामकरण छिटो टुङ्ग्याउनुपर्ने भन्दै दबाब दिँदै आएका छन्। प्रदेश सभा गठन भएको चार वर्ष बितिसकेको छ। तर, अझैसम्म प्रदेश १ नामविहीन छ। 

पहिचानको आधारमा नामकरण हुनुपर्ने मत उक्त प्रदेशमा बलियो छ। प्रदेशको नामको रूपमा भने किरात, लिम्बुवान, सगरमाथा, कोसी, किरात–सगरमाथा, किरात–कोसी आएका छन्।