'गलत तरिकाले विदेशी डलर आउन दिन्‍नँ'

काठमाडौं-प्रधानमन्त्री केपी शर्मा ओलीले गतल उद्देश्यबाट देशका पैसा भित्रन नदिने बताएका छन् । तत्कालीन नेकपा (एमाले) र नेकपा (माओवादी केन्द्र) निकट इन्जिनियर संगठनको एकता घोषणा समारोहलाई सम्बोधन गर्दै प्रधानमन्त्री ओलीले भने, 'गलत उद्देश्यका साथ गलत बाटोबाट डलर, युरो बाँडेर समाज बिथोल्ने कार्य हुन सक्दैन ।  नेपाल भित्रिने पैसा बैंकमार्फत र उद्देश्य स्पष्ट गरेर मात्र ल्याउन पाइन्छ ।'
 
त्यस्तै प्रधानमन्त्रीले आर्थिक समृद्धिका आधार तयार पार्ने लक्ष्य पूरा गर्न इन्जिनियरको भूमिका महत्वपूर्ण रहने बताए । सरकारले आर्थिक विकास र समृद्धिको लक्ष्यलाई केन्द्रमा राखेर अभियान शुरु गरेको भन्दै प्रधानमन्त्रीले त्यसलाई आत्मसात् गरेर अगाडि बढ्न इन्जिनियरहरुलाई आग्रह गरे । 

राष्ट्र निर्माणको महाअभियान शुरु भएको भन्दै प्रधानमन्त्री ओलीले नागरिकको अपेक्षा र मुलुकको चाहनालाई पूरा गर्न प्राविधिक जनशक्तिको अझ बढी योगदानको खाँचो रहेको बताए । 

राजनीतिक रुपमा कार्यसूची सकिएपछि केही राजनीतिक शक्ति अनावश्यक बखेडा झिक्ने र सरकारलाई असफल बनाउन सकिन्छ कि भन्ने ध्याउन्नमा लागेको भन्दै प्रधानमन्त्रीले गलत व्यवहार र प्रवृत्तिलाई जनताले नै ठेगान लगाउने बताए । 

प्रधानमन्त्री ओलीले विकासका काममा ढिलाइ गर्न नहुने र गुणस्तरियतालाई पनि ख्याल गर्नुपर्ने बताए । देश अहिले विकासको महाअभियानमा भएकाले यसमा इन्जिनियरहरुको भूमिका महत्वपूर्ण हुने भन्दै ओलीले सरकारलाई जनताले देश अघि बढाउने अधिकारसहितको अभिभारा सुम्पिएकाले त्यसबाट दाँयाबाँया नगरिने बताए । 

प्रधानमन्त्री ओलीले दुई संगठनको एकीकरणपछि गठन भएको प्रोग्रेसिभ इन्जिनियरीङ एशोसिएशन नेपाललाई बधाईसमेत दिए । एकताबद्ध संगठनले देशको विकासको नक्सांकन पनि थप मजबुत ढंगले गर्ने प्रधानमन्त्रीको विश्वास थियो । आधुनिक प्रविधिको प्रयोग गरेर एकाध वर्षभित्रै मुलुकलाई समृद्धिको मार्गमा डोहोर्‍याउने गरी सरकार दत्तचित्त भएर लागिपरेको उनको भनाइ थियो ।