महोत्सवमा डुंगा पिङ दुर्घटना : १४ जना घाइते, तीनको अवस्था गम्भीर

कपिलवस्तु- कपिलवस्तु महोत्सवमा दर्शक सवार डुंगा पिङ दुर्घटना हुँदा १४ जना घाइते भएका छन्। शुक्रबार साँझ भएको दुर्घटनामा तीन जना गम्भीर घाइते भएको प्रहरीले जनाएको छ।

बांणगंगा जितपुरमा सञ्चालित महोत्सवमा बाल उद्यानको डुंगा पिङ दुर्घटना भएको जिल्ला प्रहरी कार्यालय कपिलवस्तुका प्रहरी उपरीक्षक दानबहादुर कार्कीले बताएका छन्। दुर्घटनामा गम्भीर घाइते भएकाहरूलाई उपचारको लागि बुटवल लगिएको उनले बताए।

गम्भीर घाइते हुनेमा बाणगंगा नगरपालिका वडा नम्बर १ का अर्जुन क्षेत्री, सिर्जना थारु र कपिलवस्तु नगरपालिका-९ की आकृति खनाल रहेका छन्।

यसै गरी सामान्य घाइते हुनेमा शितगंगा नगरपालिका-२ का मनीषा क्षेत्री, बाणगंगा नगरपालिका वडा नम्बर ४ का आशिका बिसी, अञ्चल पुन, बमबहादुर क्षेत्री, वडा नम्बर ८ का सीमा खत्री, महिमा चौधरी, सिर्जना सुनार, वडा नम्बर ९ का कृष्ण घर्ती मगर रहेका छन्।

घाइते मध्ये चार जना सामान्य उपचारपछि घर फर्केका र सात जनाको कपिलवस्तुमै उपचार भइरहेको प्रहरीले जनाएको छ।