पल प्रकरण : तनहुँमा थुनछेक बहस सुरु, शाहको पक्षमा बहस गर्दै १० वकिल

काठमाडौं- कलाकार पल शाहविरुद्ध नाबालिग जर्बजस्ती करणी मुद्दामा जिल्ला अदालत तनहुँमा थुनछेक बहस सुरु भएको छ। पल र उनका म्यानेजर कृष्ण जोशीको बयान सकाएपछि केही मिनेटअघि बहस सुरु भएको अदालतका स्रेस्तेदार मीनबहादुर कुँवरले जानकारी दिए। 

कुँवरका अनुसार जिल्ला अदालतका न्यायाधीश हरिषचन्द्र ढुंगानाको इजलासमा बहस भइरहेको छ। ‘अहिले जाहेरवालाका तर्फबाट तीनजना वकिलहरुले बहस गरिसकेको अवस्था छ, अझै धेरै वकिलहरु छन्, बहस आज सकिँदैन, भोलिचाँही सकिने सम्भावना छ,’ स्रेस्तेदार कुँवरले नेपाल समयसँग भने। 

कुँवरका अनुसार जाहेरवालातर्फबाट ७ जना र प्रतिवादीका तर्फबाट १० जना कानुन व्यवसायीले वकालतनामा दर्ता गराएका छन्। ‘अरु एक–दुई जना थपिन सक्ने सम्भावना पनि छ’, उनले भने। जसको तर्फबाट बहस गर्ने हो, उसबाट वकालतनामा लिएर आउने कानुन व्यवसायीले मात्रै अदालतमा बहस गर्न पाउँछन्। 

थुनछेकको बहसमा दुवै पक्षको बहसपछि अदालतले आदेश जारी गर्नेछ। प्रतिवादी बनाइएका पल र उनका म्यानेजर जोशीलाई पुर्पक्षका लागि थुनामा पठाउने वा धरौटी तथा साधारण तारेखमा छाड्ने आदेश अदालतले गर्न सक्नेछ।