देशका छुट्टाछुट्टै स्थानमा तीन जना मृत फेला

काठमाडौं- देशका विभिन्न स्थानमा तीन जना मृत फेला परेका छन्। रूपन्देही, सैनामैना नगरपालिका-४ लखनपाडास्थित सैनामैना कृषि पशुपंक्षी तथा मत्स्यपालन फर्ममा काम गर्ने एक जना मृत फेला परेका छन्।

प्रहरीका अनुसार नवलपरासी सरावल गाउँपालिका-७ घर भएका ६७ वर्षीय राम आज्ञा केवट सोही फर्मको आफै सुत्ने कोठामा मंगलबार मृत अवस्थामा फेला परेका हुन्। 

यस्तै दाङ शान्तिनगर गाउँपालिका-६ कोर्वाङघाटस्थित कुलोमा बबई गाउँपालिका-७ बस्ने ६५ वर्षीया गंगी कुवँर मंगलबार मृत फेला परेकी छिन्। 

मृतकको अनुहार र खुट्टामा घाउचोट देखिएकोले इलाका प्रहरी कार्यालय खिलतपुरबाट खटिएको प्रहरीले सोधपुछको लागि एक जनालाई नियन्त्रणमा लिएको छ। 

यस्तै ताप्लेजुङ, मेरिङदेन गाउँपालिका-३ दोभान बजार नजिक तमोर नदीको किनारमा नाम, थर, वतन नखुलेका अन्दाजी ५० वर्षीय पुरुषको शव फेला परेको प्रहरीले जनाएको छ। घटनाबारे अनुसन्धान थालिएको प्रहरीको भनाइ छ।