तनहुँमा दुर्गेश थापाको बयान : न्यायका लागि लड्न पीडितलाई सुझाव दिएको हुँ

काठमाडौं- कलाकार पल शाहमाथि जिल्ला अदालत तनहुँमा दायर भएको जर्बजस्ती करणी मुद्दाको अभियोगपत्र गायक दुर्गेश थापाले नाबालिग गायिकालाई न्यायका लागि अगाडि बढ्न सुझाव दिएको बयान दिएका छन्। 

पीडितका बुबाले प्रहरीमा दिएको जाहेरीमा पलले ०७७ चैत ३१ गते बागलुङको गलकोट महोत्सव जाने–आउने क्रममा ती नाबालिगमाथि यौन दुव्र्यव्यवहार गरेको प्रसंग पनि उल्लेख थियो। पलले त्यतिबेला पीडित नाबालिगमाथि गाडीमा सँगै बसेर यात्रा गर्ने क्रममा संवेदनशील अंग चलाउने, जिस्क्याउने, समात्नेजस्ता कार्य गरेको जाहेरीमा उल्लेख थियो। 

सो यात्रामा दुर्गेश पनि सँगै रहेको जाहेरीमा उल्लेख भएकाले प्रहरीले दुर्गेशसँग त्यस विषयमा पनि सोधेको छ। अदालत पेश भएको उनका बयानमा उनले बागलुङ गलकोट महोत्सव जाने क्रममा आफूले गाडी ड्राइभ गरेको र पल र पीडित एउटै सिटमा बसेको कुरा उनले स्वीकारेका छन्। तर, दुव्र्यव्यवहार देखेकोचाँही बताएका छैनन्। 

पढ्नुस् दुर्गेशले दिएको बयान:

पीडित नाबालिगले सबै प्रकारको गीतहरु गाउने गरेकी र प्रतिवादी पल शाह भनिने पूर्णविक्रमले नेपाली फिल्म लगायत म्यूजिक भिडियोहरु खेल्ने हुँदा हामी एकै ग्रुपमा काम गर्दै आएका थियौं। 

बागलुङ गलकोटिस्थित विद्यालयको सांस्कृतिक कार्यक्रममा सहभागी हुन ०७७ चैत ३१ गते पीडित नाबालिका, पल, अन्य साथीहरु कृष्ण जोशी, सम्राट चौँलागाई, योगेश काजी र म समेतका कलाकारहरु एउटै गाडीमा सवार थियौं। गाडीमा सँगै जाने तथा फर्कने क्रममा मैले नै चलाएको थिएँ। प्रतिवादी पल शाह र पीडित नाबालिगा दुवै त्यतिबेला सँगै एउटै सिटमा बसेका थिए।

त्यस्तै राति प्रदीप थापाको घर बास बसेको अवस्थामा प्रतिवादी पलले पीडित नाबालिकालाई विवाह गर्ने आश्वासन देखाई जर्बजस्ती करणी गरेको भन्ने कुरा थाहा पछि थाहा हुन आयो। ०७८ असार २३ गते काठमाडौंको अनामनगरमा हामी भेला भई पीडितलाई न्यायको लागि अगाडि बढ्न सुझाव दिएका थियौं।