समावेशी र सामाजिक मुद्दामा फोनिजको योगदान

चितवन- नेपाल पत्रकार महासंघका अध्यक्ष बिपुल पोख्रेलले नेपाल आदिवासी जनजाति पत्रकार महासंघ (फोनिज) सामावेशी र सामाजिक मुद्दा उठाउने महत्वपूर्ण संस्थाका रूपमा विकास भएको बताएका छन्।

देशैभरबाट राष्ट्रिय महाधिवेशनमा सहभागी हुन सौराहा आएका फोनिज सदस्यको स्वागतमा नेपाल प्रेस युनियन चितवन शाखाले आयोजना गरेको कार्यक्रममा उनले समावेशिताको अभ्यासले राष्ट्रियतालाई बलियो बनाउनु पर्ने बताएका हुन्।

अध्यक्ष पोख्रेलले सञ्चारमाध्येमहरूबाट सबै वर्ग र समुदायको भाषामार्फत आफ्ना कुरा अघि बढाउन प्रयास गरेको फोनिजसँग महासंघले सहकार्य गरेर अघि बढिरहेको जानकारी दिए।

नेपाल प्रेस युनियनका वरिष्ठ उपाध्यक्ष दीपक आचार्यले प्रजातन्त्र, समावेशी सिद्धान्तका क्षेत्रमा फोनिजको महत्वपूर्ण योगदान रहेको बताए।

फोनिजका वरिष्ठ उपाध्यक्ष गजुरधन राईले राष्ट्रिय एकतालाई सर्वोपरि ठानेर फोनिज पत्रकारिता क्षेत्रमा लागेको बताए। आइतबारदेखि सुरु भएको फोनिजको सातौं राष्ट्रिय महाधिवेशन आज सोमबार नयाँ नेतृत्व चयन गरेर सम्पन्न हुँदैछ।