प्रहरी हत्यामा संलग्नलाई कारबाही गर्ने प्रधानमन्त्रीको प्रतिबद्धता

काठमाडौं– प्रधानमन्त्री शेरबहादुर देउवाले मोरङको लेटाङमा भएको घटनाको छानबिन गरी दोषीलाई कारबाही गरिने बताएका छन्। मोरङ सुन्दरहरैंचा नगरपालिकाको प्रशासनिक भवन शिलान्यास कार्यक्रममा उनले दोषीलाई कारबाही गर्ने प्रतिबद्धता जनाएका हुन्। 

हिजो आइतबार लेटाङमा स्थानीय र प्रहरीबीच झडप हुँदा महिला प्रहरी उर्मिला श्रेष्ठको मृत्यु भएको थियो। यौन दुर्व्यवहारका आरोपित पक्राउ गर्न गएको प्रहरी टोलीमाथि आक्रोशित भीडले आक्रमण गर्दा उनको मृत्यु भएको हो। स्थिति तनावग्रस्त बनेपछि  लेटाङमा आज बिहान ७ बजेदेखि कर्फ्यु लगाइएको छ।

आइतबार बिहान लेटाङ नगरपालिका–५ खेरुवास्थित शिक्षा विकास माविका ५६ वर्षीय शिक्षक मनोज पौडेलले कक्षा ६ मा अध्ययनरत विद्यार्थीमाथि होलीका दिन दुर्व्यवहार गरेको घटना सार्वजनिक भएको थियो। घटनाबारे विद्यालयमा शिक्षक र अभिभावकको बैठक बसिरहेको समयमा आक्रोशित भीडले शिक्षकलाई बन्दी बनाएर आक्रमणको प्रयास भएपछि स्थितिलाई नियन्त्रणमा लिन पुगेको प्रहरीसँग झडप भएको थियो। 

आक्रोशित भीडले सवारी साधनमा आगजनी र तोडफोड गर्न थालेपछि प्रहरीले हवाई फायर गर्नुका साथै केही सेल अश्रुग्यास प्रहार गरेको थियो। घटनामा दुई विद्यार्थीसहित १६ जना सुरक्षाकर्मी घाइते भएको प्रहरीले जनाएको छ।