मोटरसाइकल दुर्घटनामा एक जनाको मृत्यु

 सर्लाही- सर्लाहीको कविलासीमा भएको मोटरसाइकल दुर्घटनामा एक जनाको मृत्यु भएको छ। दुर्घटनामा पाँच जना घाइते भएका छन्। घाइते मध्ये तीन जनाको अवस्था गम्भीर रहेको छ।

कविलासी नगरपालिका–६, जमुनियास्थित भित्री सडक खण्डमा शुक्रबार साँझ दुई मोटरसाइकल आपसमा ठोक्किदा दुर्घटना भएको हो।

दुर्घटनामा भारतीय नम्बर प्लेट बिआर ३० क्यू ५२९२ नम्बरको मोटरसाइकल चालक कविलासी नगरपालिका–२, निवासी २८ वर्षीय धर्मेन्द्र रामको ज्यान गएको हो।

दुर्घटनामा गम्भीर घाइते भएका रामलाई उपचारका लागि जिल्ला अस्पताल मलंगवा पुर्‍याइएकोमा उनको ज्यान गएको प्रहरीले जनाएको छ।

सोही मोटरसाइकलमा सवार कविलासी नगरपालिका–२, निवासी २३ वर्षीय राजु रामको खुट्टामा गहिरो चोट लागेको छ। दुर्घटनामा संलग्न बिआर ०६ सिएफ ५३५७ नम्बरको मोटरसाइकल चालक चक्रघट्ट गाउँपालिका–५, बस्ने ३० वर्षका राजकुमार यादव र पछाडि बसेका सोही स्थानका ३० वर्षका हरिओम यादवको टाउको, अनुहार र हातखुट्टामा गहिरो चोट लागेको छ।

उनीहरू दुवैको अवस्था गम्भीर रहेको जिल्ला प्रहरीका प्रवक्ता एवं प्रहरी नायब उपरीक्षक माधवप्रसाद बुढाथोकीले जानकारी दिए।