मधेश प्रदेश योजना आयोगका उपाध्यक्ष बने ‘महामुर्ख’

जनकपुरधाम- होलीको अवसरमा जनकपुरधाममा प्रत्येक वर्ष महामूर्ख सम्मेलन हुने गरेको छ। मिथिला नाट्यकला परिषद् (मिनाप)ले यस वर्ष मधेश प्रदेश सरकारका नीति तथा योजना आयोगका उपाध्यक्ष डा. भोगेन्द्र झालाई ‘महामूर्ख’को उपाधि प्रदान गरेको छ।

महामूर्ख घोषित भएका उनलाई प्रशस्ति पत्र, मिथिला चित्रकला, फूल तथा विभिन्न तरकारी मिश्रित माला लगाएर सुशोभित गरी सम्मान गरिएको छ।

मिनापले २०६१ सालदेखि भाषा, संस्कृति, कला, सामाजिक रुपान्तरण, राजनीति जस्ता विधामा उत्कृष्ट प्रदर्शन गरी समाजमा महत्वपूर्ण योगदान पुर्‍याउने व्यक्तिलाई महामूर्ख उपाधि प्रदान गर्दै आएको छ। 

मिनापले महामूर्खका साथै विभिन्न पदवीबाट समाजका अगुवालाई सम्मान गर्ने गरेको छ। यस पटक प्रदेशसभा सदस्य मञ्जु यादवलाई अदल बदली, नेपाली कांग्रेसका नगर उपसभापति राकेश बिक्रम साहलाई टिटही, मिथिला चित्रकार मनिषा साहलाई गन्हकी, मिथिला वाइल्डलाइफ ट्रस्टका अध्यक्ष देवनारायण मण्डललाई हराशंख उपाधि प्रदान गरिएको छ।

नेपाल पत्रकार महासंघ धनुषा शाखाकी अध्यक्ष मनिका झालाई दिलतोरिया, अधिवक्ता सुदिप कोइरालालाई गोबर गणेश, गिद्धाबेलापट्टी विद्यालयका प्रधानाध्यापक पवन मण्डललाई डपोर शंख, वरिष्ठ कलाकार रामरेखा पण्डितलाई बज्रकिटका उपाधि दिइएको छ।

मिथिला चित्रकलाका कलाकार मिथिलेश्वरी कर्णलाई लालबुझक्ड, व्यवसायी अभिशेष चौधरीलाई बोतलानन्द र जनकपुरधाम उपमहानगरपालिकाका प्रमुख प्रशासकीय अधिकृत प्रद्युम्न उपाध्यायलाई बैशाखनन्दनको उपाधि दिइएको छ।

गत वर्षको महामूर्खको उपाधी नेपालका चर्चित हास्य कालाकार मदन कृष्ण श्रेष्ठ र हरिवंश आचार्य (मह )जोडीलाई प्रदान गरिएको थियो।