भक्तपुर- भक्तपुरको मध्यपुर थिमि नगरपालिका–३ कौशलटार चोक नजिक बालुवा सिमेन्ट घोल्ने मिक्सचर बोकेको ट्याक्टरबाट खसेर एक जनाको ज्यान गएको छ।
शुक्रबार राति काठमाडौंबाट भक्तपुरतर्फ आउँदै गरेको बालुवा सिमेन्ट घोल्ने मिक्सचर बोकेको ना७त २७७४ नम्बरको ट्याक्टरबाट खसेर उदयपुर गाईघाट घर भई हाल ललितपुरको इमाडोल बस्ने १८ वर्षीय प्रदीप कार्कीको मृत्यु भएको हो।
महानगरीय प्रहरी परिसर भक्तपुरका अनुसार ट्याक्टरबाट अचानक सडकमा खस्दा गम्भीर घाइते कार्कीलाई उपचारको लागि समिट अस्पताल लगिएको थियो। थप उपचारका लागि ट्रमा सेन्टर रिफर गरिएकोमा बाटोमै उनको मृत्यु भएको हो।
परिसरका प्रवक्ता प्रहरी नायब उपरीक्षक राजु पाण्डेका अनुसार ट्याक्टर चालक झापाको कन्काई नगरपालिका–५ घर भई हाल ललितपुरको इमाडोलमै बस्ने २७ वर्षीय रोशन गुरुङलाई नियन्त्रणमा लिइएको छ।