ट्रयाक्टर दुर्घटना हुँदा एकको मृत्यु, दुई घाइते

 रुकुम पूर्व- पुथाउत्तरगंगा गाउँपालिका–१२ गर्खानीमा ट्रयाक्टर दुर्घटना हुँदा एक जनाको ज्यान गएको छ । दुर्घटनामा दुई जना घाइते भएका छन्।

पुथाउत्तरगंगा–१४ राङ्सीदेखि वडा नम्बर १० तकतर्फ गइरहेको रा१त ३३७३ नम्बरका ट्रयाक्टर शुक्रबार बेलुकी गर्खानीमा दुर्घटना भएको प्रहरीले जानकारी दिएको छ। दुर्घटनामा घाइते भएका तीनजनामध्ये एकको रुकुमपूर्व अस्पतालमा उपचारका लागि ल्याउँदै गर्दा बाटोमै मृत्यु भएको जिल्ला प्रहरीले जनाएको छ ।

घाइते दुईजनालाई राति रुकुमपूर्व अस्पतालमा उपचारपछि थप उपचारका लागि नेपालगञ्ज रेफर गरिएको प्रहरीको भनाइ छ । घाइतेमध्ये एक पुरुषको अवस्था गम्भीर रहेको छ। पुथाउत्तरगंगा–१० का वीरप्रताप बुढा मगरको अवस्था खतरामुक्त रहेको प्रहरीले जनाएको छ।

मृत्यु हुने पुरुष र गम्भीर घाइते भएका पुरुषको पहिचान खुल्न सकेको छैन। ट्रयाक्टर चालक फरार रहेकाले खोजी भइरहेको प्रहरीले जनाएको छ।