ब्राउन सुगरसहित तीन जना पक्राउ

बर्दिया- ब्राउन सुगरसहित प्रहरीले तीन जनालाई पक्राउ गरेको छ। पक्राउ पर्नेमा दुई भारतीय र एक नेपाली नागरिक रहेका छन्।

बर्दिया बढैयाताल गाउँपालिका-८ कण्ठपुरस्थित नेपाल-भारत सीमा नाकामा ६८ ग्राम ९ सय ३० मिलीग्राम ब्राउन सुगरसहित प्रहरीले उनीहरूलाई पक्राउ गरेको हो।

बिहीबार गोप्य सूचनाको आधारमा ब्राउन सुगरको कारोबार भइरहेको अवस्थामा खानतलासी गर्दा भारत बहराइच जिल्ला थाना मोतीपुर ग्राम बरथनवा गाउँ शिवरात्रीपुरका २५ वर्षीया सबिना साई, सोही ठाउँ बस्ने २६ वर्षीय सद्दाम साई र काठमाडौं महानगरपालिका–७ का ४७ वर्षीय सुमन केसीलाई पक्राउ गरेको प्रहरी उपरीक्षक वीरेन्द्रबहादुर शाहीले बताए।

काठमाडौंका कारोबारीलाई भारतबाट बेच्न ल्याएको ब्राउन सुगरसहित तीन जनालाई बिहीबार जिल्ला अदालतबाट १० दिनको म्याद थप गरी कारबाही प्रक्रिया अघि बढाएको प्रहरी उपरीक्षक शाहीले बताए।