पल शाहविरुद्ध जिल्ला अदालत पूर्वी नवलपरासीमा मुद्दा दर्ता

काठमाडौं- किशोरी बलात्कारको अभियोगमा अनुसन्धानमा रहेका अभिनेता पल शाहविरुद्ध जिल्ला अदालत पूर्वी नवलपरासीमा मुद्दा दर्ता भएको छ। एक वर्षअघि गैंडाकोटको एक होटलमा पल शाहले आफूलाई बलात्कार गरेको भन्दै ती किशोरीले इलाका प्रहरी कार्यालय गैंडाकोटमा पलविरुद्ध उजुरी दिएकी थिइन्। उक्त उजुरीको आधारमा सरकारी वकिलको कार्यालयले बिहीबार मुद्दा दर्ता गरेको हो।

किशोरीले गत चैत ७ गते एउटा गीतको सुटिङको क्रममा गैंडाकोटमा राति बलात्कार गरेको भन्दै गैंडाकोट प्रहरीमा तीनसाता अघि उजुरी गरेकी थिइन्। एकैदिन सकिने छायांकनलाई दुई दिन लगाई राति रक्सी खुवाएर बलात्कार गरेको ती किशोरीको आरोप छ। 

जिल्ला प्रहरी कार्यालयका अुनसार कावासोतीस्थित सरकारी वकिलले शाहलाई १२ वर्षदेखि १४ वर्षसम्म कैद सजाय र किशोरीलाई क्षतिपूर्ति दिनपर्ने माग दाबी गर्दै मुद्दा गर्दा गरेको हो।

शाहविरुद्ध जिल्ला प्रहरी कार्यालय तनहुँमा पनि तीनै किशोरीले बलात्कारको अभियोगमा उजुरी दिएकी छन्। तनहुँभन्दा पहिला पूर्वी नवलपरासीको अदालतमा मुद्दा दर्ता भएका कारण र घटना एउटै प्रकृतिको भएकाले तनहुँ र पूर्वी नवलपरासीमध्ये कुनै एउटैमा मुद्दा आउन सक्ने प्रहरीले जनाएको छ।