जनकपुरधाम- मधेस प्रदेशमा विपद् व्यवस्थापन गर्न प्रदेशस्तरीय सञ्जाल बनाइने भएको छ। पछिल्लो समय बढ्दो विपद्को घटनालाई मध्यनजर गर्दै त्यस्तो तयारी सुरु भएको हो।
सोमबार जनकपुरधाममा प्रदेशका सरोकारवालाहरूबीच सञ्जाल गठनका विषयमा बृहत रूपमा छलफल भएको हो। कार्यक्रममा गृह मन्त्रालयअन्तर्गतको राष्ट्रिय विपद् जोखिम न्यूनिकरण तथा व्यवस्थापन प्राधिकरणका प्रवक्ता डा. डिजन भट्टराईले विपद्सँग जुध्न सरकारले सबैसँग सहकार्य गर्न चाहिरहेको बताए।
संघीय मामिला तथा स्थानीय विकास मन्त्रालयका उपसचिव ऋषिराज आचार्यले हरेक स्थानीय तह र प्रदेशमा विपद् व्यवस्थापन सञ्जाल बनेपछि तीन तहका सरकारबीच अन्तरसम्बन्ध बढ्ने र तत्काल प्रतिकार्यमा सहज हुने विश्वास व्यक्त गरे।
धनुषाका प्रमुख जिल्ला अधिकारी सुरेन्द्र पौडेलले कोभिडको अनुभवका आधारमा प्रतिकार्य गर्न जिल्ला तहमा निजि क्षेत्रको भूमिका महत्त्वपूर्ण हुने बताए। प्रदेश तहमा विपद् व्यवस्थापन सञ्जाल गठनपछि आपतकालिन अवस्थामा सामग्रीहरू भण्डारण तथा तत्काल प्रतिकार्यका लागि सहज हुने बताए।
राष्ट्रिय विपद् व्यवस्थापन तथा जोखिम न्यूनिकरण विषयक अन्तरक्रिया युरोपेली कमिसनको आर्थिक सहयोगमा प्रयास परियोजना र एफएससीएनले आयोजना गरेको हो। एफएससीएनका कार्यक्रम संयोजक अभिषेक ओझाले कार्यक्रम सहजिकरण गरेका थिए।