काठमाडौं- दक्षिण कोरिया पठाइदिन्छु भनी नेपाली नागरिकलाई ठगी गर्ने एक जना कोरियन नागरिक पक्राउ परेका छन्। पक्राउ पर्नेमा ७३ वर्षीय राई सी जुङ छन्। काठमाडौं-६ महांकालबाट उनलाई सोमबार पक्राउ गरिएको हो।
काठमाडौं महानगरपालिका-७ लाहुरेटोल चाबहिल बस्दै आएका जुङले आफू ओके कन्सल्टेन्सीको सञ्चालक भएकाले कोरिया पठाइदिन भन्दै रकम ठगी गर्दै आएका थिए।
वेल्डिङ तालिम गराई दक्षिण कोरियामा रोजगारीमा लगाइदिने भनी उनले पीडितबाट रकम लिँदै आएको उजुरी परेसँगै उनलाई पक्राउ गरिएको केन्द्रीय अनुसन्धान ब्युरोका प्रवक्ता प्रहरी उपरीक्षक श्यामकुमार महतोले जानकारी दिएका छन्।
ठगीसम्बन्धी कसुरमा आवश्यक अनुसन्धान र कारबाहीका लागि उनलाई महानगरीय प्रहरी वृत्त, गौशाला, पठाइएको ब्युरोले जानकारी दिएको छ।