पार्टीमा एमसीसीमा सहमति जुटेन भने राजीनामा दिन्छु : प्रचण्ड

काठमाडौं– नेकपा माओवादी केन्द्रका अध्यक्ष पुष्पकमल दाहाल प्रचण्डले एमसीसीबारे थप छलफल पार्टीले स्थानीय तहको निर्वाचनपछि मात्रै गर्ने बताएका छन्।

आज प्रदेश नम्बर १ को पार्टी प्रशिक्षणका लागि विराटनगर पुगेका प्रचण्डले पत्रकारहरूको प्रश्नको जवाफ दिँदै भने, ‘स्थानीय चुनावपछि एमसीसीबारे फेरि छलफल गर्छौं। हाम्रो पार्टीभित्र एमसीसीबारे एकै मत छैन। चुनावसम्म यो विषयलाई एउटा अपिलमार्फत एउटै भाषा बनाउने र निर्वाचनपछि फेरि छलफल चलाउने भन्ने छ।’

त्यसबेला एमसीसीबारे छलफल गर्दा पार्टीबाट फेल भयो भने के गनुहुन्छ भन्ने पत्रकारको प्रश्नको जवाफमा प्रचण्डले फेल भए पार्टीबाट राजीनामा दिने बताए। ‘फेल भयो भने राजीनामा दिन्छु, ढुक्क हुनुस्,’ उनले भने।

एमसीसी माओवादीको पनि समर्थनमा प्रतिनिधिसभाबाट अनुमोदन भइसकेको छ तर माओवादीभित्र केही नेताहरूले यसको विरोध भने जारी नै राखेका छन्।