म्याग्दीको धवलागिरिमा आयुर्वेद स्वास्थ्य शिविर

म्याग्दी- म्याग्दीको धवलागिरि गाउँपालिका-३ मुनामा सम्पन्न निःशुल्क आयुर्वेद स्वास्थ्य शिविरबाट २३५  लाभान्वित भएका छन्। जिल्ला आयुर्वेद स्वास्थ्य केन्द्रको आयोजनामा शनिबार शिविर सञ्चालन भएको थियो। एकदिने शिविरबाट ती बिरामीले सेवा लिएका केन्द्रका लेखापाल सुवासचन्द्र पौडेलले जानकारी दिए।

स्वास्थ्य परीक्षण, परामर्श र निःशुल्क औषधि वितरणसम्बन्धी सेवा दिइएको उनले बताए। केन्द्रका निमित्त कार्यालय प्रमुख दामोदर शर्मा, आयुर्वेद चिकित्सक सन्देश अधिकारी, वैद्य निरीक्षक प्रेम गौतम, मुना स्वास्थ्यचौकीका प्रमुख अनिषा आचार्यलगायतको टोलीले सेवा दिएको थियो।

मुना, मुदी, लुलाङ र ताकमका बासिन्दाले सेवा लिएका थिए। ग्यास्ट्रिक, गानोगोला, कब्जियत, बाथ, नशा च्यापिएको, बाथ, कमलपित्त, पिना, दम, रक्तचाप, मधुमेह, स्त्रीरोग र नशासम्बन्धी समस्या भएकाले सेवा लिएका थिए।

दुर्गम, ग्रामीण क्षेत्रका सर्वसाधारणलाई स्थानीयस्तरमै सहज र सर्वसुलभ सेवा उपलब्ध गराउने तथा आयुर्वेद उपचारप्रति आकर्षण बढाउने उद्देश्यले शिविरको आयोजना गरिएको हो। धवलागिरि गाउँपालिकाको समन्वयमा आयोति शिविरको वडा नं ३ का अध्यक्ष पुर्म पुनले शुभारम्भ गरेका थिए।  रासस