प्रधानन्यायाधीशमा सिफारिस जोशीको सुनवाई आज

काठमाडौं- संसदीय सुनुवाइ विशेष समितिले प्रधानन्यायाधीश पदका लागि सिफारिस भएका दीपकराज जोशीको सुनुवाइ आज (बिहीबार) गर्दैछ । जोशीविरुद्ध परेका पाँचवटा उजुरीमाथि छलफल गरेपछि आज सुनुवाई गर्न लागेको हो ।

समितिको गएको विहीबार बसेको बैठकले सरकारले प्रधानन्यायाधीशका लागि सिफारिस गरिएका जोशीको सुनुवाई प्रक्रिया सुरु गरेको थियो । 

प्रस्तावित प्रधानन्यायाधीशविरुद्ध पाँचवटा उजुरी संघीय संसद्मा दर्ता भएका छन् । जोशीले समितिमा प्राप्त उजुरीको जबाफ दिनेछन् । त्यसपश्चात नियुक्ति प्रक्रिया अघि बढ्नेछ । समितिको बहुमतबाट प्रधानन्यायाधीशको अनुमोदन हुन सक्ने नियम छ । 

संसदीय सुनुवाइ समितिले अनुमोदन गरेपश्चात राष्ट्रपति विद्यादेवी भण्डारीले प्रधानन्यायाधीशमा नियुक्त गर्ने संवैधानिक प्रावधान रहेको छ । 

डेढ महिना अघि संवैधानिक परिषद्ले प्रधानन्यायाधीशको लागि जोशीलाई सिफारिस गरेर संसदीय सुनुवाइका लागि पठाएको थियो । तर, संसदीय सुनुवाइ विशेष समिति नबनेकै कारण उनको सुनवाई रोकिएको थियो ।