संखुवासभा बस दुर्घटनामा मृत्यु हुनेमध्ये ११ जना एकै नगरपालिकाका

काठमाडौं– संखुवासभाको मादी नगरपालिका–६ सात घुम्तीमा बिहीबार बिहान भएको बस दुर्घटनामा ज्यान गुमाएका सबै १४ जनाको सनाखत भएको छ।

मृत्यु हुनेमा मादी नगरपालिकाका मात्रै ११ जना रहेका छन्। ज्यान गुमाउनेमा मादी नगरपालिका–६ की ३० वर्षीया सिता विक, ३२ वर्षीया अञ्जना कटवाल र ५ वर्षीया दिक्षा कटवाल रहेका छन्।

यस्तै वडा नम्बर ५ का ४९ वर्षीय भवानीप्रसाद दाहाल, ५५ वर्षीय श्याम शेर्पा र उमेश भट्टराईको पनि मृत्यु भएको छ। त्यसैगरी वडा नम्बर ४ बस्ने ६० वर्षीय बलबहादुर कार्की, २८ वर्षीया सविता कार्की र आइतबहादुर तामाङ रहेका छन्। वडा नम्बर २ बस्ने ४२ वर्षीय इन्द्र अधिकारीको पनि मृत्यु भएको छ। 

दुर्घटनामा घाइते भएका ५ जनाको उपचार भइरहेको छ। 

बस दुर्घटनाको कारण तीव्र गति रहेको प्रहरीले बताएको छ। प्रहरीको प्रारम्भिक अनुसन्धानअनुसार  तीव्र गतिका कारण चालकले घुम्तीमा बस नियन्त्रणमा लिन नसक्दा दुर्घटना भएको हो।

दुर्घटनामा बसका चालक र सहचालकको पनि मृत्यु भएको छ। सडक पिच भए पनि निकै घुमाउरो भएकाले घुम्ती काट्न नसक्दा बस पल्टिएको हो। दुर्घटना भएको ठाउँको नाम सात घुम्ती हो। बस सडकबाट करिब ३०० मिटर तल खसेको बताइएको छ।