संखुवासभा बस दुर्घटनाको कारण तीव्र गति

काठमाडौं– संखुवासभाको मादीमा आज बिहान भएको बस दुर्घटनाको कारण तीव्र गति रहेको प्रहरीले बताएको छ। प्रहरीको प्रारम्भिक अनुसन्धानअनुसार  तीव्र गतिका कारण चालकले घुम्तीमा बस नियन्त्रणमा लिन नसक्दा दुर्घटना भएको हो।

दुर्घटनामा बसका चालक र सहचालकको पनि मृत्यु भएको छ। सडक पिच भए पनि निकै घुमाउरो भएकाले घुम्ती काट्न नसक्दा बस पल्टिएको हो। दुर्घटना भएको ठाउँको नाम सात घुम्ती हो। 

बस मादीबाट झापाको दमक गइरहेको थियो। दुर्घटनामा १४ जनाको मृत्यु भएको छ। घाइते पाँच जनालाई हेलिकोप्टरबाट धरानस्थित बीपी प्रतिष्ठान लगिएको छ। मृत्यु भएका १४ जनामध्ये १२ को सनाखत भएको छ। 

मृत्यु हुनेमा मादी–६ का ३८ वर्षीय इन्द्रबहादुर अधिकारी, अञ्जना कटुवाल, तुलसा कटुवालकी छोरी ५ वर्षीया दिक्षा कटुवाल, मादी–५ का ४५ वर्षीय दिपक दाहाल, अन्दाजी ५० वर्षका श्याम शेर्पा, ५५ वर्षीया भवानी दाहाल रहेका छन्। त्यसैगरी, मादी–४ का ३८ वर्षीय आइतबहादुर तामाङ, ३५ वर्षीया सविता राउत कार्की, सहचालक ३०र३५ वर्षीय उमेश भट्टराई, तेह्रथुम औंशी डाँडाका सवारी धनी तथा सहचालक विपिन निरौलाको मृत्यु भएको इलाका प्रहरी कार्यालय चैनपुरले जनाएको छ। 

अन्यको पहिचान भएको छैन। १४ जनाकै घटनास्थलमा नै मृत्यु भएको थियो।