सुर्खेत विमानस्थल विस्तार नहुने

कर्णाली- सुर्खेत विमानस्थल विस्तारको योजना अब अघि नबढ्ने भएको छ। विमानस्थल विस्तारमा स्थानीयको असहयोगका साथै आर्थिक तथा प्राविधिक हिसाबले निकै खर्चिलो हुने भएपछि नयाँ स्थानको खोजी गर्न सरोकारवाला सहमत भएका हुन्। 

मुख्यमन्त्री जीवनबहादुर शाहीले स्थानीयवासीलाई रुवाएर विमानस्थल विस्तार नगरिने भन्दै विकल्प खोज्नुपर्ने बाध्यता रहेको बताए। ‘प्रदेश सरकारले लामो समयदेखि हालकै विमानस्थललाई विस्तार तथा स्तरोन्नति गर्न सकिन्छ भनेर धेरै प्रयास गर्‍यौँ, बजेट पनि छुट्यायौँ, सम्भव भएन’, उनले भने, ‘विस्तारमै वर्षौँ अल्झिनुभन्दा उपयुक्त नयाँ स्थानको खोजी गरी विमानस्थल निर्माण गरौँ भन्नेमा टुङ्गोमा पुगेका छौँ।’ हाल सुर्खेत विमानस्थलमा ठूलो सिट क्षमताका जहाज अवतरणमा समस्या छ। 

धावनमार्ग साँघुरो हुँदा ठूला जहाज सञ्चालन हुन नसकेपछि संघ र प्रदेश सरकारको साझेदारीमा स्तरोन्नतिको योजनाअघि सारिएको थियो। हाल धावनमार्गको लम्बाइ एक हजार २५५ मिटर छ। सुर्खेत नागरिक उडड्यन कार्यालयका अनुसार विमानस्थल विस्तार गर्न उत्तरतर्फ करिब ६०० मिटर लम्बाइ र २४० मिटर चौडाइ विस्तार गर्न करिब ३० बिघा जमिन अधिग्रहण गर्न योजना थियो। 

वीरेन्द्रनगर नगरपालिकाका प्रमुख देवकुमार सुवेदीले विमानस्थल प्रभावित क्षेत्रका बासिन्दाको असहमति रहेकाले विकल्प खोज्नु नै उपयुक्त देखिएको बताए।