भाइरल भएका गाउँपालिका प्रमुख भन्छन् – घरमा बन्दुक छ तर बोकेर हिँडेको छैन

काठमाडौं– बन्दुक बोकेर हिँड्ने गाउँपालिका अध्यक्ष भनेर सामाजिक सञ्जालमा भाइरल भएका जाजरकोटको कुशे गाउँपालिकाका अध्यक्ष हरिचन्द्र बस्नेतले भाइरल भएको तस्बिर आफ्नो नभएको बताएका छन्। अहिले भाइरल भइरहेको तस्बिरमा देखिएको बन्दुक बोकेको मान्छे आफू नभएको उनको दाबी छ।

नेपाल समयसँग कुरा गर्दै अध्यक्ष बस्नेतले राजनीतिक प्रतिशोध लिन अर्कै व्यक्तिको तस्बिरलाई आफ्नो भनेर प्रचार गरिएको बताए। ‘पहिलो कुरा त मलाई मोटरसाइकल नै चलाउन आउँदैन। घरमा पुरानो बन्दुक त छ तर पदमा बसेको भएर बोकेर हिँड्ने कुरा आउँदैन।’

नेपाली कांग्रेस जाजरकोटका सचिवसमेत रहेका बस्नेतले आफू अहिले गाउँपालिकामै रहेको बताउँदै घरमा बन्दुक भएको थाहा पाएर दुष्प्रचार गर्न खोजिएको दाबी गरे। तस्बिर सामाजिक सञ्जालमा भाइरल भएपछि प्रमुख जिल्ला अधिकारीले सोधपुछका लागि प्रहरीलाई फोन गर्न लगाएपछि आफूले जवाफ दिइसकेको उनले जानकारी दिए।