यातायात कार्यालय बुटवलको छड्के अनुगमनमा पुगिन् मन्त्री ढेंगा

बुटवल– लुम्बिनी प्रदेश श्रम, रोजगार तथा यातायात व्यवस्था मन्त्री पुरमती ढेंगा मगरले यातायात व्यवस्था कार्यालयहरुको छड्के अनुगमन गरेकी छन्। उनले बुटवल दीपनगरस्थित यातायात व्यवस्था कार्यालय सवारी चालक अनुमतिपत्र कार्यालयको छड्के अनुगमन गरेकी हुन्।

अनुगमनमा सेवाग्राहीले कार्यालयबाट हुने काम व्यवस्थित नभएको, फोटो खिच्नका लागि मात्रै घण्टौं लाइनमा बस्नुपरेको गुनासो मन्त्री समक्ष गरेका छन्। कार्यालयमा टोकन प्रणाली नहुँदा लाइन भद्रगोल भएको, पहुँचवाला व्यक्तिले लाइन मिचेर छिटो सेवा लिने गरेको र कर्मचारीहरुले सेवाग्राहीका समस्याप्रति बेवास्ता गरेको भन्दै सेवा सुधार गर्न मन्त्री ढेंगाको ध्यानाकर्षण गराएका थिए।

सेवाग्राहीको गुनासो सुनेपछि मन्त्री ढेंगाले कर्मचारीलाई सेवा प्रवाह छिटो छरितो बनाउन निर्देशन दिएकी छन्। उनले यातायात व्यवस्था कार्यालयको सेवालाई जनमैत्री बनाउन अनुगमनलाई निरन्तरता दिने बताएकी छन्।