तेस्रो मुलुकको आयातले स्वदेशी मरिचको बिक्री ठप्प

भद्रपुर- तेस्रो मुलुकबाट आयातित मरिचका कारण स्थानीय किसानको उत्पादन बिक्री हुन छाडेको छ। 

झापाका अर्जुनधारा, मेचीनगर र बुद्धशान्तिमा मरिचको व्यावसायिक खेती हुने गर्छ। तर, बिक्री नहुँदा किसान मारमा परेका छन्। 

अर्जुनधारा नगरपालिकाको कृषि शाखाका अधिकृत शालिकराम भट्टराईका अनुसार जिल्लामा आर्थिक वर्ष ०७४/७५ मा १७ मेट्रिक टन मरिच उत्पादन भएको छ। सुपारीको बोटमा लहराएर फल्ने भएकाले मरिचको खेतीलाई ‘परजीवी खेती’पनि भनिन्छ।

गत वर्ष प्रतिकिलो मरिच १६ सय रुपैयाँमा घरबाटै बिक्री भएको थियो । यसवर्ष प्रतिकिलो चार सयमा समेत बिक्री नभएको अर्जुनधारा-१० का दिनबन्धु पोखरेलले बताए। 'मैले यसपालि ६ सय किलो मरिच उत्पादन गरेको छु,' उनले भने, 'तस्करी गर्न तेस्रो मुलुकबाट आयात गरिएको मरिचका कारण हाम्रो उत्पादन बिकेन।' 

बुद्धशान्ति गाउँपालिका-७ का योगेश निरौलाको पीडा पनि उस्तै छ। तेस्रो मुलुकबाट मरिचको आयातमा प्रतिबन्ध लगाए मात्रै स्थानीय उत्पादनले उचित मूल्य पाउने उनले बताए। 

काँकडभिट्टास्थित मेची भन्सारबाट आव ०७४\७५ मा ९६ हजार आठ सय किलो मरिच आयात भएको थियो। भन्सार प्रमुख टेकबहादुर अर्यालका अनुसार इन्डोनेसिया, श्रीलंकालगायत तेस्रो मुलुकबाट मरिच आयात हुने गरेको छ। 

नेपाल आउने तेस्रो मुलुकको अवैध मार्गबाट भारत पुर्याइने गरेको छ। इलाका प्रहरी काँकडभिट्टाले तीन दिनअघि मेचीनगर-६ भान्सा खोलाबाट अवैध रूपमा भारत लैजाँदै गरेको पाँच सय किलोभन्दा बढी मरिच बरामद गरेको डीएसपी टंकप्रसाद भट्टराईले जानकारी दिए।