इंग्लिस प्रिमियर लिगमा म्यानचेस्टर सिटीको जित

काठमाडौं- इंग्लिस प्रिमियर लिग अन्तर्गत गएराति भएको खेलमा म्यानचेस्टर सिटीले शानदार जित निकालेको छ। आइतवार राति भएको डर्बी खेलमा सिटीले म्यानचेस्टर युनाईटेडलाई ४-१ गोल अन्तरले हराएको हो। सिटीको जितमा केभिन डे ब्रुएन र रियाद महरेजले समान दुई-दुई गोल गरे। युनाइटेडका जाडोन सान्चोले एक गोल फर्काए।

खेलको पाँचौ मिनेटमा ब्रुएनले गोल गर्दै अग्रता दिलाएका थिए। खेलको २२औं मिनेटमा युनाइटेडका लागि सान्चोले गोल गर्दै खेल बराबरीमा फर्काए।

तर, त्यसपछि लगातार गोल खाँदा युनाइटेड पराजित भएको हो। ब्रुएनले खेलको २८औं मिनेटमा व्यक्तिगत दोस्रो गोल गरे। खेलको ६८ औं मिनेटमा महरेजको गोलमा सिटीले ३-१ को अग्रता बनायो।

खेलको इन्जुरी समयमा महरेजले व्यक्तिगत दोस्रो गोल गर्दै सिटीलाई ४-१ गोल अन्तरले विजयी गराएका हुन्। शीर्ष स्थानको सिटीले यो जितसँगै २८ खेलमा ६९ अंक जोडेको छ। पाँचौ स्थानको युनाइटेडले ४७ अंक बनाएको छ।