मतदानस्थलमा विस्फोट : सुरक्षाकर्मीसहित ३१ को मृत्यु

इस्लामावाद- पाकिस्तानको उत्तर-पश्चिमी शहर क्वेटामा मतदान स्थलनजिक भएको विस्फोटमा परी ३१ जनाको मृत्यु भएको छ । 

पाकिस्तानभर बुधबार राष्ट्रिय र प्रान्तीय संसद्का लागि निर्वाचन भइरहेको छ । शहरको पूर्वी क्षेत्रस्थित बाइपास सडकछेउको मतदान केन्द्र नजिकै विष्फोट भएको हो । 

स्थानीय अस्पतालले ३१ को मृत्यु र २८ जना गम्भीर घाइते भएको पुष्टि गरेको छ । मृतकहरू सुरक्षाकर्मी पनि छन् । 

यस्तै, दक्षिण–पूर्वी प्रान्त सिन्धको लाडकानामा पनि विष्फोट भएको छ, जसमा परी पाकिस्तान पिपल्स पार्टीका तीन कार्यकर्ता घाइते भएका छन् । स्थानीय शाह मोहम्मदस्थित मतदान केन्द्र बनाइएको उक्त पार्टीको शिविरमा विष्फोट भएको हो । अतिवादी समूहले विष्फोट गराएको उक्त पार्टीको अनुमान छ । 

केन्द्रीय संसद्का दुई सय ७० सिटका लागि चुनाव भइरहेको छ, जसमा ९५ वटा पार्टीका ११ हजार ६ सय ७६ उम्मेदवार मैदानमा छन् । १० करोड ६० लाख मतदाता रहेको निर्वाचन आयोगले जनाएको छ । 

तस्बिर : जी न्युज