नवनियुक्त राज्यमन्त्रीहरुको शपथ आज 

जनकपुरधाम- प्रदेश २ सरकारले नियुक्त गरेको राज्यमन्त्रीहरुले आज पद तथा गोपनियताको शपथ लिँदै छन् । बुधबार प्रदेश मुख्यालयमा ३ बजे नवनियुक्त राज्यमन्त्रीहरुको शपथ लिने कार्यक्रम रहेको बताइएको छ । 

प्रदेश सरकारले सरकार गठनको पाँच महिनापछि मन्त्रिपरिषद विस्तार गरेको हो । सरकारले राज्यमन्त्रीमा सुरेश मण्डल, डिम्पलकुमारी झा र अभिराम शर्मालाई नियुक्त गरेको छ । 

मण्डललाई उद्योग तथा पर्यटन, झालाई भौतिक पूर्वाधार र शर्मालाई सामाजिक विकास राज्यमन्त्रीमा सिफारिस गरिएको छ । नवनियुक्त तिनैजना राज्यमन्त्रीहरुलाई मुख्यमन्त्री लालबाबु राउतले पद तथा गोपनियताको शपथ दिलाउने कार्यक्रम रहेको छ ।

राज्यमन्त्रीमा शपथ लिनेहरुमा झा राजपा अध्यक्ष मण्डलका सदस्य अनिल झाकी श्रीमती हुन् भने शर्मा असई थमन विक हत्या प्रकरणका फरार अभियुक्त हुन् ।

संघीय समाजवादी फोरम र राजपा गठबन्धनको प्रदेश २ सरकारमा फोरमले आफ्ना मन्त्रीहरु पठाइ सकेपनि आन्तरिक विवादका कारण राजपाले नाम पठाउन सकेको थिएन् ।