आमा नै ‘सिरियल किलर !’ : चार वर्षमा तीन सन्तानको हत्या

धनगढी- कैलालीमा एक आमाले ११ महिने छोरीको हत्या गरेकी छन् । गोदावरी नगरपालिका-९ धनचौरीकी ४० वर्षीया तारा जोशीले ११ महिने छोरी डम्बरा जोशीको हत्या गरेको पारिवारिक स्रोतले जानकारी दिएको छ । 

यही घरमा ताराले आफ्नो सन्तान मारेको यो तेस्रो घटना हो । सासू सुनमती जोशीले दिएको जानकारीअनुसार रातिसँगै सुताएकी छोरी बिहान मृत अवस्थामा भेटिएकी छन् । सुनमतीले आफू र आफ्नो श्रीमान् काठमाडौं भएको बेला घरमा नातिनीको हत्या गरेको बताइन् । ताराले यसअघि दुई वर्षअघि एक महिने छोरा र चार वर्षअघि १० दिनका छोरालाई पनि घाँटी थिचेर हत्या गरेको  सुनमतीले जानकारी दिइन् ।

ताराका श्रीमान् हर्क जोशी सुस्त मनस्थितिका छन्। उनीहरूको पाँच वर्षको छोरा भने आफूसँगै राखेकाले जोगिएको सुनमतीले बताइन् । ताराले के कारणले सन्तानको हत्या गर्छिन् भन्ने खुलेको छैन तर उनी निकै रिसालु रहेको परिवारले जानकारी दिएको छ । 

ताराले यसअघि पहिलो लोग्नेको घरमा पनि सन्तानलाई नदीमा बगाएर माइतीमा बसेको खुलेको छ। आफन्तले खबर गरेपछि प्रहरी घटनास्थलमा गइसकेको जिल्ला प्रहरी कैलालीका डीएसपी हरिबहादुर वलीले जानकारी दिए । 

अत्तरियाबाट गएको प्रहरीको टोली खुटिया नदीमा पानी बढेकाले जान नसकेपछि पुनः धनगढी भएर गएको उनले सुनाए । घटनाबारे प्रहरी घटनास्थल पुगेपछि मात्रै थाहा हुने वलीले बताए ।