सबुजले यसरी हटाए विरोध प्रदर्शनमा फालिएका फोहोर

काठमाडौं- नेपाली कांग्रेसले डा गविन्द केसीको जीवन रक्षाको माग गर्दै गरेको विरोध प्रदर्शनमा भएको फोहोर हटाउन काठमाडौंका पार्टी सभापति सबुज (कृष्ण) बानियाँ सक्रिय भएका छन्।

उपत्यकाका तीन जिल्ला काठमाडौं, भक्तपुर र ललितपुरको संयुक्त विरोध प्रदर्शनमा भएको फोहोर पम्पलेट, प्लेकार्ड, पानीका बोतल लगायतका सामग्री सबुजले संकलन गरी व्यवस्थापन गरेका हुन्। फोहोर संकलन पश्चान सबुजले भने, 'यो फोहोर हामीले गरेका हौ र यसलाई सफा गर्ने जिम्मेवारी र कर्तव्य हाम्रै हो।’

उनले यो फोहोर व्यवस्थापनलार्इ सांकेतिक रुपमा नेपाल सरकारका अधिनायकवादी गतिविधि तथा गलत क्रियाकलाहरुलार्इ कांग्रेसले सफा गरेर जनतालार्इ स्वच्छ र स्वस्थ वातावरणमा बाँच्न पाउने अधिकारको सुनिश्चित गर्ने बताए। 

नेपाली कांग्रेसले गोविन्द केसीको जीवन रक्षा र माफिया पोष्ने विधेयक फिर्ता, शान्तिपूर्ण रुपमा नारा जुलुस लाउन पाउनुपर्नेमा निषेधित क्षेत्र घोषणा गरेको भन्दै विरोध गर्दै आइरहेको छ। 

चिकित्सा शिक्षाको सुधारको माग राख्दै डा गोविन्द केसी २५ दिनदेखि आमरण अनशनमा छन्।