धनलक्ष्मीले आकाशमै जन्माइन् शिशु

सुर्खेत-  सुत्केरी व्यथाले च्यापेपछि हेलिकोप्टरमार्फत् अस्पताल लैजाँदै गरेकी एक महिलाले हेलिकोप्टर उडिरहेकै समयमा शिशुलाई जन्म दिएकी छन्। मुगुको खत्याड गाउँपालिका– ४ स्थित जुन्का गाउँकी २० वर्षीय धनलक्ष्मी रावलले हेलिकोप्टरमै शिशुलाई जन्म दिएकी हुन्।

मुगुदेखि सुर्खेतसम्मको ४० मिनेटको आकाशको यात्रामा हेलिकोप्टरमा चढेको ३० मिनेटपछि उनले छोरा जन्माएको चालक प्रमुख सेनानी रचन श्रेष्ठलाई उद्धृत गर्दै सुर्खेतस्थित नेपाली सेनाको पश्चिम कमाण्डका सेनानी बेलिना मल्लले जानकारी दिए। 

मल्लका अनुसार बच्चा उल्टो भएर सुत्केरी हुन नसकेपछि रावललाई सुर्खेतदेखि हेलिकोप्टरबाट उद्धार गरिएको थियो।

'सुत्केरी रावललाई १८ घण्टा लामो समयसम्म व्यथा लागेर छट्पटिएको अवस्थामा हेलिकोप्टरबाट उद्धार गरिएको हो,'  उनले भने, 'थप उपचारका कर्णाली प्रदेश अस्पतालमा भर्ना गरिएका आमाछोरा दुवैको स्वास्थ्य अवस्था सामान्य रहेको छ।'