प्रेमीसँग मिलेर श्रीमानको हत्या

धनगढी–कैलालीमा प्रेमीसँग मिलेर श्रीमतीले श्रीमानको हत्या गरेको एउटा घटना सेलाउन नपाउदै पुनः सोही प्रकृतिको घट्ना दोहोरिएको छ ।

कैलालीको भजनी त्रिशक्ति नगरपालिका–९ गंजवा गाउँमा २६ बर्षीया निर्मला राजीले प्रेमी १९ बर्षीय दिलिप राजीसँग मिलेर श्रीमान २६ बर्षीय नन्दु राजीको हत्या गरेको खुलेको हो । 

जिल्ला प्रहरी कार्यालय कैलालीका प्रवक्ता प्रहरी नायव उपरीक्षक हरीबहादुर वलीका अनुसार निर्मलाले दिलिपसँग मिलेर नन्दुको हत्या गरी जंगलमा गाडेको अवस्थामा शव फेला परेको छ । 

दिलिप र निर्मलाको भनाईका आधारमा नन्दुको शव घरदेखि करिव एक किलोमिटर टाढा मंगलबार बिहान साढे आठ बजे प्रहरीले फेला पारेको हो । 

उनीहरु दुबै जना प्रहरी हिरासतमा छन् भने नन्दुको शव पोष्टमाटमका लागि सेती अञ्चल अस्पतालमा राखिएको छ । मृतकका सात र तीन बर्षका दुई छोरा छन् । उनीहरुका आफन्त अरु कोही नहुँदा अहिले दुई बालकको बिचल्ली भएको छ । 

कसरी पत्ता लाग्यो घट्ना

प्रहरीका अनुसार निर्मलाका प्रेमी दिलिप साउन ३ गते राति नन्दुको घरमा गएको गाउँलेले थाहा पाए । र केहि दिन पहिले मात्र हुम्लामा काम गर्ने नन्दु पनि घर आएका थिए । 

त्यो कुरा गाउँलेले देखेका थिए । जुन दिन दिलिप राति उनको घारमा गएका थिए त्यसको भोलिपल्टबाट नन्दु देखिएनन् । गाउँलेलाई शंका लाग्यो र अर्काको घरमा राति जाने दिलिपलाई पक्राउ गरी सम्झाउनु पर्‍यो भन्दै गाउँलेले प्रहरीलाई खबर गरे । 

प्रहरीले उनलाई ७ गते नियन्त्रणमा लियो । सोधपुछका क्रममा नन्दु पनि घरमा नभएको सुनिएपछि प्रहरीलाई शंका लागेपछि श्रीमती निर्मलालाई पनि नियन्त्रणमा लिएर सोधपुछ गरियो । सोधपुछका क्रममा मध्यरातमा दुबैले घाँटी च्यापेर नन्दुको हत्या गरी जंगलमा शव गाडेको कुरा स्वीकार गरे ।

प्रहरीले उनीहरुले भनेको ठाउँमा गएर गाडेको अवस्थामा शव भेटाएर पोष्टमाटका लागि अस्पताल पुर्‍याएको छ । 

इलाका प्रहरी कार्यालय भजनीका प्रमुख प्रहरी निरीक्षक राजेन्द्रबहादुर चन्दका अनुसार नन्दु कामको ज्याला मजदुरी गर्ने भएकाले कामको शिलशिलामा प्रायः बाहिर हुन्थ्ये । करिव डेढ बर्षदेखि दिलिप र निर्मलाको बीचमा अबैध सम्बन्ध रहेको र त्यो कुरा घरमा आएको बेला नन्दुले थाहा पाएपछि घरमा झगडा हुन थाल्यो । 

श्रीमानले अबैध सम्बन्ध बारे थाहा पाए पछि प्रेमी बोलाएर श्रीमानको हत्या गरेको खुलेको प्रहरी नायव उपरीक्षक वलीले जानकारी दिए । त्यहि गाउँमा माईती भएकी निर्मलाले  कामको शिलशिलामा आएका नन्दुसँग बिहे गरेको खुलेको छ । घट्ना बारे थप अनुसन्धान भइरहेको प्रहरीले जानकारी दिएको छ । 

यस अघि कञ्चनपुरको पुनर्वास नगरपालिका–२ की लक्ष्मी बडेलाले साउन ८ गते आफ्नो प्रेमीसँग मिलेर श्रीमान तेजबहादुर विष्टको हत्या गरेको घट्ना अनुसन्धानै क्रममा छ ।