भूमि व्यवस्था मन्‍त्री फेरिने, खनालले छाड्ने, अर्याल आउने

काठमाडौं- प्रधानमन्त्री केपी शर्मा ओलीले मन्त्रीहरुको जिम्मेबारी हेरफेर गर्ने भएका छन् । उपेन्द्र यादव नेतृत्वको संघीय समाजवादी फोरम सरकारमा आएसँगै शुरुभएको किचलो समाधान गर्न ओलीले मन्त्रीहरुको जिम्मेवारी हेरफेर गर्न लागेका हुन् ।
 
स्वास्थ्यमन्त्रालयको जिम्मेवारी समालेका यादवले राज्यमन्त्री पद्मा अर्यालका कारण काम गर्न असहज भएको गुनासो गरेपछि प्रधानमन्त्री ओलीले अर्याललाई राज्यमन्त्रीबाट हटाउने तयारी गरेका छन् । अर्याललाई भूमि व्यवस्था मन्त्रालयको जिम्मेवारी दिने तयारी भएको स्रोतले जनाएको छ ।
 
कृषि, भूमि व्यबस्था तथा सहकारी मन्त्रालयलाई टुक्राएर भूमि सुधार व्यबस्था र कृषि तथा सहकारी मन्त्रालय गरि दुईवटा मन्त्रालय बनाउने भएको छ । अर्याललाई भूमि सुधार व्यबस्था मन्त्रालयको जिम्मेवारी दिने तयारी प्रधानमन्त्रीले गरेको स्रोतको दाबी छ । 

हाल यस मन्त्रालयको जिम्मेवारी सम्हालेका चक्रपाणी खनाल 'बलदेव'लाई भने कृषि तथा सहकारी मन्त्रालयको मात्रै जिम्मेवारी दिइने भएको छ । खनालले भूमि सुधारका लागि केहि सकारात्मक कदम चालेपनि भागबन्डा मिलाउनै पर्ने बाध्यतामा सरकार परेपछि उनले भूमि सुधारको जिम्मेवारी छाड्नु परेको हो ।

सरकारले जिम्मेवारी हेरफेरको निर्णय मंगलबार नै गर्नसक्ने प्रधानमन्त्री तथा मन्त्रिपरिषद्को कार्यालय स्रोतले जनाएको छ ।