ललितपुरमै छैन आगो नियन्‍त्रण गर्न भरपर्दो औजार

ललितपुर- आगलागी तुरुन्त नियन्त्रणका लागि महानगरका भित्री भागमा पानी राख्ने ट्यांकी र फायर मेसिन व्यवस्था हुन सकेको छैन । 

महानगरपालिकामा जम्मा नागबहालमा मात्रै आधुनिक आगो निभाउने यन्त्र र रिजर्भ पानी छ । नगरका अधिकांश भाग आगलागीको जोखिम रहेको नगर प्रहरी प्रमुख कदमलाल महर्जनले बताए ।  दमकल छिर्ने बाटोसमेत नभएका यी स्थानमा उपकरणको व्यवस्था गर्ने र स्थानीयवासीलाई तालीम दिएर आगलागी नियन्त्रण आउन सक्छ । उनले भने, “त्यसको व्यवस्थापन गर्न नसकिएकाले हिउँदमा आगलागीको जोखिम हुन्छ ।” 

आगलागी नियन्त्रण समयमै हुँदा ठूलो धनजनको क्षति हुनबाट जोगाउन सकिने उनले बताए । फायर मेसिन र पानीको उपलब्धता हुँदा स्थानीयवासीले आगो लाग्नासाथ निभाउन थाल्छन् । जसले गर्दा आगो ठूलो क्षेत्रफल फैलिएर धेरै क्षति हुन सक्दैन । प्रमुख महर्जन भन्छन्, “यी सामग्री उपलब्ध हुँदा नगरवासी दमकललाई खबर गर्नुभन्दा पहिले आगो निभाउन थाल्न सक्छन् ।” 

साँघुरो बाटोका कारण नगरका भित्री भागमा दमकल लैजान कठिन रहेको प्रमुख महर्जनले बताए । चोकको भित्र आगलागी हुँदा गाडीलाई जाने ठाउँसम्म लगेर त्याहाँबाट रोलिङ गर्दै लानुपर्छ । रोलिङ घरमाथिबाट मिलाएर आगो लागेको स्थानसम्म पुर्‍याउँदा बढी समय लाग्ने हुँदा क्षति बढ्छ । उनी भन्छन्, “स्थानीयस्तरमा नै फायर मेसिन हुँदा सजिलो र चाँडो हुन्छ ।” 

केही वर्ष पहिले जापानी सहयोग संस्था जाइकाले रिजर्भ ट्यांकी निर्माण र फायर मेसिन खरिदमा आर्थिक र प्राविधिकरुपमा सहयोग गरेको थियो । संस्थाले स्थानीयवासीलाई आगो नियन्त्रणको उपायसमेत सिकाएको थियो ।