अदालतमा स्वचालित पेसी लागु गर्न सुझाव

काठमाडौं- कायममुकायम प्रधानन्यायाधीश दीपककुमार कार्की समक्ष सर्वोच्च अदालतसहित देशभरका अदालतमा स्वचालित पेसी (अटोमेसन) लागु गर्न सुझावसहितको प्रतिवेदन पेस गरिएको छ।

कामु प्रधानन्यायाधीश कार्कीलाई शुक्रबार न्यायाधीश हरिकृष्ण कार्कीको संयोजकत्वमा बनेको समितिले तयार गरेको सुझाव सहितको प्रतिवेदनमा सर्वोच्च अदालतमा अटोमेसन लागु नभएसम्म गोलाप्रथाद्वारा पेसी तोकिँदै आएको छ।

न्यायाधीश कार्कीकै संयोजकत्वमा रहेको विकृतिविहीन न्यायालय अध्ययन प्रतिवेदनमा सर्वोच्च अदालतमा पेसी तोक्ने कार्यबाटै भ्रष्टाचार सुरु हुने उल्लेख थियो। उक्त प्रतिवेदनमै पेसी तोक्ने अधिकार प्रधानन्यायाधीशबाट झिकेर अटोमेसनमा लैजानुपर्ने उल्लेख थियो।

प्रधानन्यायाधीशको २०७७ साउन २७ को निर्णयानुसार स्वचालित पेसी व्यवस्थापनका सम्बन्धमा यसअघि भएका अध्ययन प्रतिवेदनसमेतको अध्ययन गरी सुझावसहितको प्रतिवेदन पेस गर्ने कार्यादेशसहित समिति गठन भएको थियो।

सर्वोच्च अदालतका प्रवक्ता विमल पौडेलका अनुसार आज उक्त प्रतिवेदन कामु प्रधानन्यायाधीशसमक्ष पेस भएको र सुझावमा सर्वोच्च अदालतको पूर्ण बैठक बसेर छिट्टै अटोमेसनमा प्रणालीमा पेसी व्यवस्थापन गर्नुपर्ने रहेको छ।