आजका अखबार : ओली-दाहाल झनै आक्रामक

काठमाडौं- राजधानीबाट प्रकाशित मंगलबारका राष्ट्रिय दैनिक पत्रिकाहरुले डा गोविन्द केसीको अनसन र कांग्रेसको आन्दोलनका विषयमा नेकपाका दुई अध्यक्ष केपी ओली र प्रचण्डले दिएको अभिव्यक्तिलाई प्राथमिकतामा पारेका छन् । 

अनशन २५ औं दिनमा शीर्षकमा मुख्य समाचार छापेको कान्तिपुर दैनिकले डा केसीको अनशन र कांग्रेसको आन्दोलन प्रति ओली र प्रचण्ड आक्रमक बनेको खबरलाई विशेष प्राथमिकताका साथ छापेको छ । 

समाचारमा जनाइएअनुसार उनीहरुले डा केसी राजनीतिक स्वार्थको सिकार बनिरहेको आरोप लगाएका छन् । कांग्रेसले राजनीतिक हतियार बनाएर  वार्ता प्रक्रियामा समेत अवरोध पुर्याइरहेको उनीहरुको भनाइ छ । 

आमाको आग्रहमा डा केसीले रगत जाँच गरेको विषयलाई एङ्कर न्युज बनाएको आजको अन्नपूर्ण पोस्टले भने डा केसीलाई वार्ताको आमन्त्रण शीर्षकमा मुख्य समाचार छापेको छ । 

नेकपाका संस्थापक पुष्पलाल श्रेष्ठको स्मृति दिवसका अवसरमा सोमबार भएको कार्यक्रमलाई सम्बोधन गर्दै प्रधानमन्त्री ओलीले वार्तामा आउन डा केसीलाई आग्रह गरेका हुन् । ओलीले डा केसीलाई नै चिकित्सा शिक्षाको क्षेत्रमा गर्नुपर्ने सुधारको जिम्मा लिन समेत आग्रह गरेको अन्नपूर्णले लेखेको छ ।  

आजको नयाँ पत्रिकाले भने नीजि भन्दा सरकारी मेडिकल कलेज नै अब्बल देखिएको विशेष रिपोर्ट प्रकाशित गरेको छ । उसले मेडिकल काउन्सिलको परिक्षामा कुन मेडिकल कलेजबाट कति प्रतिशत विद्यार्थी पास हुँदै आएका भन्ने डाटा छाप्दै लेखेको छ– मेडिकल कलेजलाई सम्बधन दिन काउन्सिलको यहि नतिजा हेरे पुग्छ ।