असिनापानीले पोखरामा ११ करोडको क्षति

काठमाडौं– पोखरामा गत आइतबार परेको भीषण असिनापानीले ११ करोड रुपैयाँबराबरको क्षति भएको पोखरा महानगरपालिका कृषि तथा पशु विकास महाशाखाले जनाएको छ। बाक्लो असिनापानीका कारण केही जनावर मरेका छन् भने तरकारी तथा फलफूलसहित बालीनाली नष्ट भएको छ।

पोखरा महानगरपालिकाका कृषि महाशाखा प्रमुख मनोहर कडारियाले पोखरा वडा नम्बर ९, ११, १३ र १८ मा धेरै क्षति भएको र अन्य वडामा सामान्य क्षति भएको बताए। राज्यले कृषकलाई दिएको बिमा सुविधा समेत कृषकले सदुपयोग गरेमा यसप्रकारका क्षतिबाट राहत पुग्न सक्ने उनको सुझाव छ।

असिनाका कारण तरकारी बाली, नगदे बाली, फलफूल, तोरी, आलु लगायतमा धेरै क्षति पुगेको छ। असिनापानी परेको दोस्रो दिनसम्म पनि पूर्ण रुपमा असिना पग्लिएको छैन।

असिनाकै कारण पोखरा महानगरपालिका वडा नम्बर ११ मा फलमान गुरुङले सञ्चालन गर्दै आएको उदय अर्गानिक कृषि फार्मका २ वटा भैंसी मरेका छन्। फार्मको टिनको छानोमा असिनाको भार पर्दा सो भाँचिएर थिचेका कारण भैंसी मरेका हुन्। त्यस्तै तरकारीका टनेलहरु भत्किएका छन्। गुरुङका अनुसार उनको फार्ममा २० लाख बराबरको क्षति भएको छ।

उता, पोखरा वडा–११ मा केहरमान गुरुङले सञ्चालन गर्दै आएको गोर्खाली मनकामना नर्सरीमा पनि ठूलो क्षति पुगेको छ। उनले ४ रोपनी क्षेत्रफलमा लगाएको विभिन्न जातका फूलहरु टनेलसहित भाँचिँदा पूर्ण रुपमा क्षति भई २० लाख बराबरको नोक्सान पुगेको बताए।

यसैगरी पोखरा–११ का कृषक मोतीराम भट्टराईको पनि तराकारी खेतीमा ठूलो क्षति भएको छ। पोखरा–११ का अध्यक्ष मोहनप्रसाद बास्तोलाले पोखरा क्षेत्रमा परेको असिनापानीको मुख्य केन्द्र सो वडा भएकोले आफ्नो वडामा धेरै क्षति पुगेको बताए। उनले कृषकको राहतमा आफूले पहल गरेको बताए।

पोखरामा आइतबार दिउँसो भीषण असिनापानी परेको थियो। असिनापानीले पोखराको सडक केही समय अवरुद्ध भएको थियो। न्यूरोड, चिप्लेढुंगा, फूलबारी, बगर, अमरसिंह चोक, रानीपौवा क्षेत्रमा असिनाले सडक नै छोपिएको थियो। सडकमा परेको असिना हटाउन डोजरको समेत प्रयोग गरिएको थियो।