आज साउने सोमबार : बोलबम यात्रा सुरु 

काठमाडौँ- आज साउन महिनाको पहिलो सोमबार । हिन्दू धर्माबलम्बी नारीहरुले भगवान शिवको पूजा आराधना गरी मनाउँदैछन् । शिव भगवानको पुजा–अर्चनाका लागि बिहानैदेखि पशुपतिनाथलगायत विभिन्न शिव मदिरमा भक्तजनको भीड लागेको छ। 

विशेषगरी महिलाहरुले हरियो रंगका वस्त्र, चुरा र मेहंदी लगाएर भगवान शिवको पूजा तथा आराधना गरी ब्रत बस्ने गर्छन । साउन महिनाको सोमबार शिवको प्रिय दिन मानिन्छ ।

भगवान् शिवको प्रिय महिना साउन र बार सोमबार भएकाले यस दिन व्रत गरी पूजाआजा गर्ने एवं नदी, ताल, तलाउलगायत पवित्र तीर्थस्थलबाट जल ल्याएर चढाउने परम्परा रहेको नेपाल पञ्चाङ्ग निर्णायक समितिका अध्यक्ष प्राडा रामचन्द्र गौतमले जानकारी दिए। यसो गरेमा मनोकांक्षा पूरा हुने धार्मिक विश्वास छ। 

साउने सोमबारको व्रत दाम्पत्य जीवन, पारिवारिक एवं सन्तान र परिवारको कल्याण तथा सुख शान्तिका लागि पुरुष महिला दुवैले गर्नुपर्ने शास्त्रीय वचन रहेको उनले बताए।

सूर्य मिथुन राशिबाट कर्कट राशिमा प्रवेश गरेर दक्षिणायन शुरु भएको महिना साउन भगवान् शिवको प्रिय महिना मानिन्छ। भगवान् शिवले सूर्य र चन्द्र दुवैलाई धारण गर्नु भएकाले चन्द्रशेखर पनि भनिन्छ। चन्द्रशेखर भगवान् शिवका हजार नाममध्ये एक हो।

बोलबम यात्रा सुरु 

भगवान् शिवको प्रिय महिना साउन र बार सोमबारबाट बोलबम यात्रा सुरु भएको छ । आफ्नो भाकल वा मनोकाक्षा पुरा हुने विश्वाकासका साग शिवका भक्तहरुले आजबाट बोलबम यात्रा सुरु गरेका हुन् । 

काठमाडौको पशुपति र चितवनको देवघाटमा बोलबम मेला भर्नका लागि नेपालका अधिकांश जिल्लाका अतिरिक्त छिमेकी मुलुक भारतबाट समेत भक्तजनहरु आउने गरेका छन् ।

यस्तै सिराहा र धनुषा जिल्लाको सिमाामा पर्ने कमला नदीमा पनि बोलबमको ठूलो मेला लाग्ने गर्दछ । यहाँबाट जल उठाएर विभिन्न शिवका मन्दिरमा पुगेर तिर्थयात्रीले जल चढाउने गरेको छन् ।