तरुण दलको प्रदर्शनमा घम्साघम्सी

जनकपुरधाम-डा.गोविन्द केसीको समर्थनमा कांग्रेस निकट नेपाल तरुण दलले जनकपुरमा आइतबार गरेको प्रदर्शनमा प्रहरी र प्रदर्शनकारीबीच घम्साघम्सी भएको छ । तरुण दल आवद्ध युवाहरुले जर्बजस्ती जिल्ला प्रशासन कार्यालय भित्र प्रवेश गर्न खोजेपछि दुबै पक्षबीच घम्साघम्सी भएको हो ।

जनकपुर उपमहानगरपालिका–४ पिडडिया माइस्थानस्थित कांग्रेस पार्टी कार्यालयबाट निस्केको तरुण दलको विरोध प्रदर्शन जिल्ला प्रशासन कार्यालय अगाडी पुगेको थियो । प्रदर्शनमा सहभागीहरुले वर्तमान सरकार विरुद्ध चर्को नाराबाजी गरेका थिए ।

विरोध प्रदर्शनमा तरुण दल धनुषाका सभापति संजयलाभ कर्ण, उपसभापति राकेश विक्रम साह, नगरसभापति पंकज महतो लगायतका नेता कार्यकर्ताहरुको सहभागिता थियो ।

डा.केसीको मागप्रति समर्थन जनाउँदै तरुण दलको प्रदर्शनमा शनिबार प्रहरीले बल प्रयोग गरेपछि तरुण दलका केन्द्रीय अध्यक्षसहितका नेताहरु घाइते भएका थिए । शान्तिपूर्ण प्रदर्शनमा प्रहरीले दमन गरेको विरोधमा तरुण दलले सबै जिल्लास्थित जिल्ला प्रशासन कार्यालय अगाडी प्रदर्शन गरेको थियो ।