बीपी स्मृतिमा वृक्षारोपण र रक्तदान

जनकपुरधाम- नेपाली कांग्रेसका नेता तथा पूर्वप्रधानमन्त्री बीपी कोइरालाको पूण्य तिथिको अवसरमा धनुषा कांग्रेसले वृहत्त वृक्षारोपण कार्यक्रम सम्पन्न गरेको छ ।

कोइरालाको ३६ औँ पूण्य तिथिको अवसरमा कांग्रेस नगर समितिले आइतबार जनकपुर-१२ स्थित श्री माध्यमिक विद्यालय कुवा रामपुरमा वृक्षारोपण गरेको हो । 

प्रदेशसभा भवन नजिकै रहेको विद्यालयमा विभिन्न प्रजातिका दुई सय १० बोटविरुवा लगाइएको नगर समिति सभापति मनोज साहले जानकारी दिए ।

वृक्षारोपण कार्यक्रममा नेपाली कांग्रेसका प्रतिनिधिसभा सदस्य स्मृतिनारायण चौधरी, प्रदेश २ का संसदीय दलका नेता रामसरोज यादव, जिल्ला सभापति महेश शंकर गिरी लगायतका नेताहरुको उपस्थिति थियो ।

यसैगरी बीपीको ३६ औँ पूण्य तिथिको अवसर पारेर नेवि संघ धनुषाले रक्तदान कार्यक्रम सम्पन्न गरेको छ । नेवि संघका नगर सभापति सुमन ठाकुरको आयोजनामा स्थानीय पिडाडी चोकमा आयोजना गरिएको रक्तदान कार्यक्रममा ५४ जनाले रक्तदान गरेको जिल्ला सभापति सुजित मिश्रले जानकारी दिए ।

यसै अवसरमा नेवि संघले आइतबार साँझ जनकपुर-८ स्थित जानकी वृद्धाश्रममा फलफूल तथा लत्ता कपडा वितरण र राराब क्याम्पस परिसर भित्र वृक्षारोपण कार्यक्रम गर्ने निर्णय गरेको झाले बताए ।