'पैसा खुवाएर खोलिएका मेडिकल कलेजलाई सम्बन्धन दिलाउन सरकारी मरिहत्ते'

काठमाडौं-कांग्रेस सभापति शेरबहादुर देउवाले पैसा खुवाएर खोलिएका मेडिकल कलेजहरूलाई सम्बन्धन दिलाउन सरकारले मरिहत्ते गरिरहेको बताएका छन् । 

'सारा पैसा उठाउँदै खाएका छन्,' देउवाले भने, 'पैसा खुवाएर खोलिएका मेडिकल कलेजहरूलाई सम्बन्धन दिन सरकार मरिहत्ते गरिरहेको छ सरकारले ।' आमरण अनशनरत डा. गोविन्द केसीका माग जायज भएकाले तत्काल पूरा गर्न सरकारलाई उनले आग्रह गरे । 

बीपी कोइरालाको ३६ औं स्मृति दिवसका अवसरमा पार्टी मुख्यालय सानेपामा आयोजित सभालाई सम्बाधेन गर्दै देउवाले आफू नेतृत्वको सरकारले डा. केसीका माग पूरा गरेको उल्लेख गरे । माथेमा आयोगको प्रतिवेदनका आधारमा डा. केसीले विधेयक ल्याउन माग गरेको तथा उनीसँग छलफल र सहमति गरेरै अध्यादेश ल्याइएको देउवाले स्पष्ट पारे । 'डा. केसीका पक्षमा हामी छौं,' उनले भने ।

वर्तमान कम्युनिस्ट सरकार एकतन्त्रीय सर्वसत्तावादी शासन ल्याउन लागिपरेको उनले आरोप लगाए । भने, 'शान्तिपूर्ण विरोध गर्न पाउने अधिकार कम्युनिस्ट सरकारले खोस्दैछ । भोलि बोल्न पनि दिँदैन र त्यसलगत्तै लेख्न पनि दिँदैन ।' 

बीपी कोइरालाले त्यतिबेलै कम्युनिस्टहरू कति अलोकतान्त्रिक हुन्छन् भनेर चिनिसकेकाले पञ्चायती व्यवस्थाविरुद्धको आन्दोलनमा सहकार्य गर्न नमानेको उनले उल्लेख गरे । देउवाले भने, 'विगतमा राणा र राजासँग लडेको कांग्रेस आज कम्युनिस्टसँग लड्न तयार छ ।' 

वरिष्ठ नेता रामचन्द्र पौडेलले भने, 'समाजवादमा गुणस्तरीय शिक्षा र सर्वसुलभ स्वास्थ्य हुनुपर्नेमा वर्तमान दुवैलाई सरकारले महँगो र सर्वसाधारणको पहुँचबाहिर पुर्‍याएर कस्तो समाजवाद ल्याउन खोजेको हो ?'